Psalms 81 - Iñupiatun Mumiksat Uqalugiksuat

Atuun Nalunaiqsauruaq Niqinaqinikun

Atuqtit aullarriŋannun. Gittith-kuaqługu. Asaph-kun.

¹ Nipatulusi atuġitchi quviasuunmi God-iptiŋnun suaŋŋatigiraptiŋnun; atuġitchi nanġaunmik God-iŋanun Jacob!

² Atuqtuurausiġitchi aviḷuqtaġuuruanik, atuqtuuralluataġlusi nuqaqtilignik.

³ Nipauqłuktautaa niqinaqivium nivliqsillugu, tatqiq nuivaallukpan suli tatqiq aqvalluaġiksikpan.

⁴ Taamna tavra pitqurauruq Israel-mi, Pitqurriutaa Jacob God-iŋata.

⁵ Ilaata qaiñŋaraŋa iñuŋiñun Israel aŋuyakkamiuŋ nunaŋa Egypt. Tusaaŋaruŋa uqautchimik kaŋiqsiḷaisamnik.

⁶ “Nanmagirasi nanmaktinŋaiŋagitka; Tigumiaqtasi katchiḷiaksrat akigaaġiŋaiqsinŋagitka.

⁷ Iḷuiḷḷiuġunmun tikiññavsi, ququulaŋagivsiñŋa, aasii annautiŋagivsi. Kiuŋagivsi nalunaqtuamiñ inimniñ kallugmiñ. Uuktuŋagivsi imaŋiññi Meribah-m.

⁸ Tusaasitchi, iñugiramaaŋ, kiliktuutimnik; Israel-guruasii, naalaġnitquyumapiallakkaluaqtuŋa ilivsiññun!

⁹ Piqaqtuksrauŋitchusi allaniñŋaqtauruamik god-imik akunnavsiññi; purvigiruksraġiŋitkisi allaniñŋaqtauruat god-it.

¹⁰ Uvaŋa Ataniq ilivsi God-iksi, Egypt-miñŋaurrigiŋaraqsi. Aatchaġiñ, aasii immiġñiaġiga.

¹¹ “Iñugiraġma aglaan tavra naalaġnisuŋitkaanŋa; Israel-gum kamagisuŋiñŋagaaŋa.

¹² Tavraasii isumalluaġiirrutiŋiññun qaiñŋagitka maliġitquvlugich iliŋisa pisuutiŋich.

¹³ Qanuqtuq iñugiraġma naalaġniliñŋa; Israel-gumtuq kamagiŋaliŋa!

¹⁴ Qilamiuraq akiisisimaaġniaġaluaġitka akiḷḷiŋich pisaġilugiḷḷu akiḷḷiqsrupayaaqtuat iliŋiññik.

¹⁵ Uumikłiqsuaguruat Ataniġmik punnayaqtut iqsiḷutiŋ uvamnun. Tatavsausiaŋat taimuŋaaglaan illuni.

¹⁶ Pamanŋanayaġaluaġivsi palauvaksraġiksuanik suli niġisuiqsuaqtillusiḷu honey-mik uyaġagmiñ.”