Psalms 80 - Iñupiatun Mumiksat Uqalugiksuat

Aŋaiyyun Utillasipkaquvlugich Nunaqpauruat

Atuqtit aullarriŋannun. Atuunmun “Sivunniuġutim Lilies-ŋi.” Asaph-kun. Psalm.

¹ Naalaġnisigut, Imnaiḷiqirauruatiin Israel-mun; tusaasigut, aullarrauruatiin Joseph-gum kiŋuniiŋiñik. Aquppivigñiñ qulaanni cherubim,

² nalunaiġḷugu iḷitchuġipkaġiñ maŋŋuqaqtuanun Ephraim-mik, Benjamin-mik, suli Manasseh-mik. Maniraġiuŋ suaŋŋatin; qaiḷutin annautisaqtuqsigut!

³ Utqutisigut, God-auruatiin! Suli kiiñan qaummaġiksirruŋ uvaptinnun, annaurrauyumaugut!

⁴ Qanutun imña sivisutigiruamik, Ataniiq Sapiġñaqtuaguvlutin God-tauruatiin, qinnaŋŋatiginiaqpigich iñugiraqpich aŋaiyyutiŋich?

⁵ Niġipkaŋagitin isumaaġutim qulviŋiñik, imiqtitpaŋagitin qulviñik atqunaq.

⁶ Atiŋirrutiġuqtinŋagivsigut avalliiptiŋnun nunaqpauruanun nunagiraqput pisigivlugu; suli uumirigipta kipagiugaġaatigut.

⁷ Utqutisigut, Kamanaqtuatiin God-auruatiin! Kiiñan qaummaġiksirruŋ uvaptiŋnun, annaurrauyumaugut!

⁸ Qaġġisiŋagiñ napaaqtuayaaq Egypt-miñ; aullaqtitaŋagitin allat nunaqpauruat aasii nautchirriutivlugu nunaŋannun.

⁹ Iniksriuŋagiñ nagguviksraŋanik; maŋŋuŋich nauŋarut tasamuŋa, aasii siḷviłługu nuna.

¹⁰ Qimiqqat matuŋammiut taġġaŋiñik; qisiqsiutiŋisa taġġaŋich cedar-qpagniinŋammiut.

¹¹ Ayuuqtigiŋarut qisiqsiutiŋich Mediterranean Sea-muaglaan suli tikiḷġataqługu Euphrates River.

¹² Summanmi aasii uvva navguŋavigich avataanni sapukutaŋich? Tavra nalautchaapayaaqtuat pukugniaqtut grape-gutiŋiñik;

¹³ Tuttuqłuich napaaqtuniñ tunmalugiuġaġigaat suksraunġiqł̣ugu, suli pamiqsaaguŋitchuat niqigimmiraġigaat.

¹⁴ Utiġiñ uvaptinnun, Sapiġñaqtuatiin God! Anmun qiviaġlutin qiḷaŋmiñ tautuksigut; qaiḷutin annauttuuŋ manna napaaqtuayaaq!

¹⁵ Qaiḷutin annautisaqtuaġuŋ manna napaaqtuayaaq nautchirriutiŋaran, tamanna nutauruaq napaaqtuayaaq naukaŋgiñ suaŋaruaguvlugu!

¹⁶ Ikipkaŋagaat napaaqtuayaaġiran suli kivluqługu; suakkapkich iñugiratin suksraunġiqsut.

¹⁷ Munaġikkich iñuich naliġaaġiŋaratin, nunaqpauruaq suaŋasipkaŋaran.

¹⁸ Tunutqikkumiñaitkiptigiñ; iñuupkaqtigut, aasii ququullaviginiaġiptigiñ.

¹⁹ Utqutitigut, Ataniiq God-auruatiin Sapiġñaqtuaguvlutin. Maniraġiuŋ uvaptiŋnun naglikkutiñ annaurrauyumaugut.