Psalms 79 - Iñupiatun Mumiksat Uqalugiksuat

Aŋaiyyun Nunaqpauruaq Annautitquvlugu

Psalm aglaaŋa Asaph-gum.

¹ God-auruatiin, ukpiŋaitchuat marra pisaġiŋagaat nunan. Salumaiḷiŋagaat salumaruaq aŋaiyyuvikpaiñ Jerusalem-lu suksraunġiqł̣ugu.

² Timiŋich iñugiraqpich unirruiññaŋagaich tiŋmiaqpagnun, timiŋich kivgaġiraqpich pamiqsaaguŋitchuanun niġitquvlugich.

³ Aunaaqtipaluŋagaich iñukpich auŋat imiqtun; auk maqiŋaruq imiqtun iluqaani Jerusalem, iḷuviqtiksraqaŋaitchut tuquruat.

⁴ Pisaaŋŋatikun aŋalatchuusiŋagaatigut avalliipta nunaqpauruat; iglautigivluta kipagiraġigaatigut.

⁵ Ataniiq, tavra qinnautiŋaniaqpisigut taimuŋaaglaan? Sigñakkutin ikualatuiññaġniaqpa igniqtun?

⁶ Kuviraġiuŋ qinnautiqpaiñ nunaqpauruanun nanġaiḷaitchuanun ilignik, iñugnun aŋaiyyusuitchuanun ilignun.

⁷ Qanukkii uvva suksraunġiŋagaat Jacob; maqunŋagaallu nunaŋa.

⁸ Tatavsaġnasigut piḷuutiŋich pisigilugich maŋŋuupta. Nagliginasuaqsigut; ikayuġnaqsipiaġataŋarugut.

⁹ Ikayuqsigut God-auruatiin, suli annautiluta; annautisigut suliqutigiŋaiġḷugiḷḷu piḷuutivut atqiñ pisigilugu.

¹⁰ Summan nunaqpauruat apiġiniaqpatigut, “Nauŋ immaimña God-iksi?” Qiñiġukkiptigiñ tatavsaġupkich nunaqpauruat maqipkaŋammarruŋ auŋat kivgaġiraqpich.

¹¹ Naalaġnikkich iiqtuaqłutiŋ nipattuat tigutaaqtat, aasii kamanaqpaktuamik suaŋŋatignik qiḷiqsimaŋaiqsillugich tuqutauruksriakkaluaŋich.

¹² Ataniiq, akisakkich allat nunaqpauruat tallimat malġuiqsuaġlugich, pisaaŋŋatiŋisitun iliŋnun.

¹³ Tavraasii uvagut, ilvich iñutin, imnaiguruat niġiñiaġvigiraġni, quyyatiqaġniaqtugut iliŋnun isuitchuamun suli kiŋuniġiiksuani nanġaġniaġivsigiñ taimuŋaaglaan.