Psalms 78 - Iñupiatun Mumiksat Uqalugiksuat

God Iñuniḷu

Poem aglaaŋa Asaph-gum.

¹ Iñugiramaaŋ, naalaġnisitchi iḷisaurrutimnun; suli tusaalugich uqalutka.

² Uqaġniaqtuŋa uuktuutitigun aasii uqautigilugich nalunaqtuat utuqqaich taimaŋŋaqtat,

³ sut tusaaŋaravut suli iḷitchuġivlugich, sut maŋŋuupta uqautigisuuŋaraŋich uvaptiŋnun.

⁴ Iriqsimaniaŋitkivut miqłiqtuptinniñ; uqautiniaġivut kiŋuniġiiguruanun Atanġum suaŋŋataalu kamanaqtuallu savaaŋich suli aliuġnaqtuat ilaata savaŋaraŋich.

⁵ Pitquranik qaitchiŋaruq Israel-miuguruanun suli piraksriutinik kiŋuvaaŋiñun Jacob. Ilaata iḷisautiŋagaich maŋŋuuvut iḷisaurrutigitquvlugich pitqurani miqłiqtuŋiñun,

⁶ kiŋuniġiigñiaqtuat iḷitchuġiyumagaich suli tainnaptauq iliŋisa uqautiyumagaich miqłiqtutiŋ.

⁷ Tavra tainna pigumiŋ ukpiġutiktiŋ tunŋapkaġniaġmigaat God-mun suli puiguŋiḷḷugich savaaġiŋaraŋich, aglaan kamagituiññaġlugich piraksriutiŋich.

⁸ Irrusiqaġniaŋitchut maŋŋuumiktitun, sivunmuusuuruatitun suli paaqłaktaġuuvlutiŋ, uummatimigni iḷumutuuviuraġlutiŋ inŋaitchut God-mun ukpiġunmigmi tunŋaviuraŋaitchuatun ilaanun.

⁹ Aŋuyaktiŋit Ephraim, satkuqaġaluaŋŋaġmiŋ pisiksiñiglu qaġruniglu, qimaaŋarut aŋuyaŋmata.

¹⁰ Maliġiŋaitkaat sivunniuġutigiŋaraqtiŋ God-mun; suli kamaksrisuŋiñŋarut pitquraŋiñik.

¹¹ Piiguŋagaich ilaata savaaġiŋaraŋich, aliuġnaqtuat savaaŋich qiñiŋagaluaqługich.

¹² Maŋŋuuŋisa takkuanni, God savaŋaruq aliuġnaqtuanik Zoan nunaŋani Egypt-mi.

¹³ Aviŋagaa taġiuq aasii ikaaqtiłługich; immat nutqaqtinŋagaich katchitun iḷivḷugich.

¹⁴ Aullatiŋagaich uvlumi nuviyakun aasii unnuaqtutilaaŋatun qaumaniŋagun igniġum.

¹⁵ Qupiŋammigaich uyaġaich nunagluktuami aasii imiksraqaqtiłługich iḷaŋaniiqługu itiruaniñ.

¹⁶ Maqsraluktuanik savaŋammiuq uyaġagmiñ aasii maqipkaqługu kuuktun.

¹⁷ Aglaan tavra piḷuktuanik savaaqaqtuiññaŋarut akiḷḷiġivlugu God, aasii suli nunagluktuami paaqłaŋagaat Qutchiŋñiqtauruaq.

¹⁸ Pisaaġivlutiŋ God uuktuŋammigaat niqiksritquuqłutiŋ niġisuktamignik.

¹⁹ Akiḷḷiġivlugu God suli uqaqłutiŋ, “God imña niqiksraqaqtitchiyumiñaqpa nunagluktuami?

²⁰ Iḷumun tavra uyaġak anauŋagaa, aasii imaq iḷaŋaniñ maqirraqsiŋaruq; aglaan tavra punniksritchuminagmivatigut suli niqiqaqtitchumiñaġmivatigut ilaata iñuni?”

²¹ Aasii tavra Ataniq qinnaliŋaniqsuq tusaakamigich; igniġmik qaipkaiŋaniqsuq akiḷḷiġivlugich kiŋuniiŋi Jacob, suli qinnaliutisaiññaŋaniġai iñuŋi Israel,

²² ukpiġutaił̣ł̣utikkii God-mun suli annautiyumiñaġnasugiŋił̣ł̣utiŋ ilaanun.

²³ Aglaan uqautiŋaniġaa pakimña qiḷak aasii piraksriivḷuni upkuaŋi agmaquvlugich;

²⁴ aitchuŋaniġaich palauvaksranik qiḷaŋmiñ, qaipkaivḷuni maana-mik niqiksraŋannik.

²⁵ Tavraasii niqiqaŋarut niqiŋiñik isaġulgich, suli God-im aitchuŋaniġai iḷaŋaniiqsuallasivḷugich.

²⁶ Ilaatasuli nigiqpaqtinŋagaa, suli suaŋŋanmigun kiluagnamiñ anuqłiqtiłługu;

²⁷ qaipkaiŋamammiuq tiŋmianik iñugmiñun iñugiaktigiruanik qaviaŋatun taġium siñaani;

²⁸ katagaaŋarut nullaunmiviannun akunġannun tupiŋisa.

²⁹ Tavra iñuich niġisuiqsuaŋarut; ilaata aitchuŋagaich niqiksraŋiññik.

³⁰ Aglaan tavra niġiḷḷaġmiŋ katchuŋaisimarutsuli niġipkaqtillugich suli,

³¹ God-im qinnautiŋaniġaich; aasii tuqułługich suaŋaniqtauruat iñuŋich, aŋutiŋisa piḷguniqtaġiraŋich Israel-mi.

³² Tainna aŋalatkaluaqtillutiŋ iñuich pigiiḷḷiqiŋaiŋaiññiqsut; aliuġnaqtuanik savakkaluaqtillugu ukpiġiŋaiññiġaat.

³³ Tavraasii uvluksrakkaluaŋich isukłisinŋaniġaich aniqsaaġniqtun suli iñuggutaiqługich tavrauvvaa tatamaanaqtuatigun.

³⁴ Tuquttaġimmagich iḷatiŋ, iñuuruat saattaqtut ilaanun; isumalitqikł̣utiŋ aŋaiyyuvigiraġigaat katchuŋaiqł̣utiŋ.

³⁵ Aasii itqaqłutiŋ God ilimignun uyaġautilaaŋanik, Qutchigñiqtauruaq God tasuqsaqtigiraqtiŋ.

³⁶ Aglaan uqayuqsaaġvigiugaqługu qaniġmignik; sagluuruanik uqautiraġniġaat.

³⁷ Uummatimigniñ iḷumutuuġvigiŋaitkaat; maliġiŋaitkaat sivunniuġutiktiŋ ilaanun.

³⁸ Aglaan God naglikkutiqaŋaruq iñugmiñun. Suliqutigiŋaiŋagaich piḷuutiŋich suli suksraunġiŋił̣ł̣ugich. Iñugiaktuani tigummiraġigaa qinnautini aasii nunummivḷugu ilaata qinnautiqpakkaluani.

³⁹ Itqaumaŋaruq iñugruiññautilaaŋiññik, anuġitun nalautchaaġutiruatun aasii piiġmivḷuni.

⁴⁰ Qanutun imña akulaisigivlugu paaqłaŋavarruŋ nunagluktuami; qavsiiqsuaqługu isumaaqtinŋavarruŋ!

⁴¹ Qavsiiqsuaqługu uuktuġaġigaat God qinnaguksaaqługu Salumaruaq God-iŋat Israel.

⁴² Piiguŋagaat ilaata kamanaqtuaq suaŋŋataa suli annautiŋammatiŋ akiḷḷiimigniñ

⁴³ suli savaaŋich sivuani kamanaqłutiŋ aliuġnaqtuat natiġnaŋani Zoan nunaŋani Egypt.

⁴⁴ Ilaata kuugich auguqtinŋagaich, aasii Egypt-miut imiġumiñaiñŋarut kuuġuuraniñ.

⁴⁵ Akunġannuktitchiŋaruq iñugiakpaktuanik niviaġrugnik, aasii nagliksaaqtiłługich, suli naaġaayich siqumiñŋagaat nunaŋat.

⁴⁶ Ilaata qaiñŋagaich niqiksriat nauriaŋich nuttagayugnun aasii suksraunġiqł̣ugich nautchiiviŋich.

⁴⁷ Suksraunġiŋagaich siiġñaliuġviŋich natatquġnanik qanniktiłługu suli fig napaaqtuutiŋich qiqsruqqaaqtiłługich.

⁴⁸ Tuqunŋammigaich pamiqsaaŋich natatquġnanik suli igniġuuqpatitaqtitchivḷuni niġrutiŋiññun.

⁴⁹ Qinnautimiñi nagliksaaġunmik igḷutuqtinŋagaich kuviraġivlugu qinnautiqpani, tilisivḷuni isaġulignik suksraunġiqsiksraŋiñik.

⁵⁰ Tigummiŋaitkaa ilaata qinnautini naakkaunnii naŋaqtiłługu tuqqun, tuqupkaqługich aglaan iluiłłiuġutikpaktigun.

⁵¹ Ilaata tuqunŋagaich aŋayukłiŋich iġñiġuruat aŋayukłiŋiḷḷu pamiqsaat aŋusallut iluqaani Egypt-mi.

⁵² Tavraasii aullativlugich iñuni imnaiḷiqiritun suli sivulliqsuaqługich nunagluktuami.

⁵³ Aullatiŋagaich anayanaitchuakun, tavraasii sumik iqsisiqaŋił̣ł̣utiŋ; aglaan taġium aksraligvigiŋagaich akiḷḷiŋich.

⁵⁴ Salumaruam nunagmi killiŋanuutiŋagaich, iġġiñun taliqpigmiñik piññaktaaġiŋaramiñun.

⁵⁵ Uŋunŋagaich nunaqpaugaluaqtuat, iñuni sivunmun iglaummata; aviktuagaqsivḷugich aasii nunaŋich maŋŋuuruanun Israel-mi kiŋuvaannaktaaġitquvlugich; aasii qaitchiġmivḷugich aimmiviŋich uŋuttami iñugmiñun.

⁵⁶ Aglaan tavra paaqłagaġniġaat Qutchigñiqtauruaq God aasii uuktuqługu. Kamaksriḷaiñŋaniqsut piraksriutiŋiñik,

⁵⁷ aglaan paaqłaguuŋaniqsut kamaksriḷaił̣ł̣utiglu maŋŋuumiktitun, ukpiġnayuiñŋarut saquŋaratun pisiksim qaġruatun.

⁵⁸ Qinnaliqsittaġniġaat atuġuuvlutiŋ god-aitchuat aŋaiyyuviŋiññik, sigñaliqsittaġniġaat iñuuraqpaliamiktigun.

⁵⁹ God qinnalipiaġataŋaniqsuq tautukkamigich, tavraasii ayyaŋaniġaich Israelite-guruat.

⁶⁰ Qimagruiññaŋaniġaa tupini Shiloh-miittuaq, tupiq inillaŋarani akunġannun iñuich.

⁶¹ Akiḷḷiptinnun piññaktaaġipkaŋaniġaa Sivunniuġutim Kiguunniŋa, ilaata suaŋŋataanik qaummataaniglu piqaqtuaq.

⁶² Qaisaġiŋaniġaich nanmiñiq iñuni savikpagmun; qinnautipiaġataŋaniġaich ilaan iñuni.

⁶³ Nukatpiat tuqutauŋavlutiŋ aŋuyagmata, aasii niviaqsiat uiksraqaŋaiññiqsut.

⁶⁴ Savikpagnik tuquġaŋaniġaich aŋaiyyuliqsiqpaŋich, suli aġnat uiḷgaŋaruat qivġuyumiñaiñmiñiqsut.

⁶⁵ Kiisaimmalu Ataniq iqiiġataqpuq, siñiktuaq iqiiġmatun; irrusiqaŋaruq aŋutitun piallaktittaŋatun wine-gum.

⁶⁶ Akiḷḷiiñi utinmuktinŋagaich kanŋunaqtuamun iḷipkaqługich isuitchuamun.

⁶⁷ Tavra suli ayyaŋamammigaich kiŋuvaaguruat Joseph-mun; naliġaaġiŋaiññiġaich maŋŋuqaqtuat Ephraim-miñ.

⁶⁸ Aglaan piksraqtaaġivlugich maŋŋuqaqtuat Judah-miñ, piksraqtaaġivlugulu Mount Zion, piqpagirani.

⁶⁹ Tavrani nappaŋagaa Aŋaiyyuvikpak iḷivḷugu qiḷaŋmiittuatun aimmivimisun; inillalluataŋagaa payaŋaiqł̣ugu nunatun savaamisun taimuŋaaglaan.

⁷⁰ Naliġaktaaġiŋagaa kivgani David; iñuksraqtaaġivlugu imnaich niġiñiaġviŋiñiñ,

⁷¹ imnaiḷiqivianiñ, umialiguqtinŋaniġaa Israel-mun, imnaiḷiqiriġuqługu iñuŋiñun God-im ilaata iñumiñun.

⁷² Tavraasii David-gum aullatiŋaġaich pitqiksiġautaitchuamik irrusiqaqłuni, suli aullativlugich pisuġlimigun.