Psalms 77 - Iñupiatun Mumiksat Uqalugiksuat

Tutqiun Navianaqsimman

Atuqtit aullarriŋannun, Jeduthun-mun. Asaph-kun. Psalm.

¹ Nipatuvluŋa ququularuŋa God-mun; Nipatuvluŋa ququulakapku, tusaasuugaaŋa.

² Isumaalugnaqtuaq tikiñman aŋaiyyusuuruŋa Ataniġmun; Unnuaqtutilaatun isaaqsimaraqtuŋa aŋaiyyunmi, aglaan paqilaitchuŋa tutqiunmik.

³ Isummatigikapku God, aniqsaapagaqtuŋa; Isumalaaqama iḷitqusimñi qapiŋasiraqtuŋa.

⁴ Siñiksallaiqsittaġigaaŋa unnuaqtutilaatun; Isumaalukpaił̣ł̣uŋa uqallalaitchuŋaunnii.

⁵ Isumagiraġigitka uvlut qaaŋianiŋaruat suli itqaumagivlugich qaaŋianiŋaruat ukiut.

⁶ Unnuaqtutilaaŋatun isumaqpagaqtuŋa; Isumalaaqama uvamnun apiġiraqtuŋa:

⁷ “Atanġum imña ayyaguuniaqpatigut taimuŋa? Iviġaumagitqigñiaġaluaqpatigut imña?

⁸ Nakuaġiŋaiqpatigut taimuŋaaglaan? Ilaata unniqsuqłiisiŋich isukłitpat taimuŋa?

⁹ God imña puiguqłuni naglikkutaiqpa? Qinnautaata imña inaŋiqpauŋ iḷunŋusuutaa?”

¹⁰ Tavraasii uqallaktuŋa, “Anniġñautigipiksuaġiga una: God-im suaŋŋataata ikayullaiġmatigut.”

¹¹ Itqaumaginiaġitka kamanaqtuat savaatin, Ataniiq; Itqaġniaġitka aliuġnaqtuat savaatin sivuani.

¹² Isummatiginiaġitka savaapayauratin; Isumalaaġutiginiaġitka iluqaisa kamanaqtuat savaaġiŋaratin.

¹³ Sunapayaaq savaaġiran, God-auruatiin, salumaruaguruq. Allamik god-aitchuq iliktun kamanaqtigiruamik.

¹⁴ Ilvich tavra God savaguuruaq aliuġnaqtuanik; maniuŋagiñ suaŋŋatin akunġanni iñuich.

¹⁵ Suaŋŋatigirakkun tasuŋagitin iñuktin, kiŋuniiŋich Jacob-gum suli Joseph-gum.

¹⁶ Immat tautukkamisiñ, God-auruatiin, iqsiḷiŋarut, suli itiniqtaŋich taġium uulillaŋarut.

¹⁷ Sialukpaŋaruq; kalluk qaiġuatinŋaruq qiḷaŋmiñ, suli igniġuuqpatitaqłuni suŋnamulliqaa.

¹⁸ Kallualaŋaruq, suli igniġuuqpatitaqtuam qaummaatinŋagaa nuna; nuna uulillakłuni aulaŋaruq.

¹⁹ Pisuaŋarutin qaiḷḷiqsigun; ikaaŋagiñ itiruaq taġiuq, aglaan tumitin qiñiġnaŋaitchut.

²⁰ Aullatiŋagitin iñuktin imnaiḷiqiritun, Moses-lu Aaron-lu aullarrigivlugik.