Psalms 76 - Iñupiatun Mumiksat Uqalugiksuat

God Akimari

Atuqtit aullarriŋannun. Nuqaqtiligaqłuni. Psalm aglaaŋa Asaph-gum. Atuun.

¹ God una iḷisimagaat Judah-mi; ilaan atqa qiksigirauruq Israel-mi.

² Aimmiviqaqtuq Jerusalem-mi; suli iniqaqtuq Zion-mi.

³ Tavrani naviŋagaich qaġruŋich akiḷḷiiŋisa, akkiaġautiŋich suli savikpaŋich, aaŋ, iluqaisa satkuŋich.

⁴ Qanutun qaumaniqaqtigivich, Kamanałhaaqłutin unnii iġġiñiñ niġrutaukkaqtuaniñ aŋuraksranik.

⁵ Uluġiitchuat aŋuyaktiŋich suġautaiyapiallaŋagaich aasii paŋmami siñiktut tuqqunmi; suaŋŋatiŋat suli sanatuniŋat anniqsuutauŋaitchuq.

⁶ Suakkapkich, God-auruatiin Jacob-mun, tuttuqpaiḷḷu usiaqsiqsuallu ulġuŋarut tuquvlutiŋ.

⁷ Aglaan ilvich, Ataniiq, iluqapayauraġmiŋ qiksigiraksraġigaatin. Kiña unnii makitayumiñaitchuq sivuġaġni qinnaliġuvich.

⁸ Isivġiutin iḷisimanaqtinŋagiñ qiḷaŋmiñ; nuna iqsitchaŋaruq suli tuaksruiqł̣uni,

⁹ makinnavich isivġiisaqłutin, annautisaqługich nagliksaaqtitaupayaaqtuat nunami.

¹⁰ Iñugruiññam qinnautaa nanġautiġuvsaaqsiññaġaqtuq iliŋnun; tamatkua annaktuat aŋuyaktuani atullaniaġaich nalunaiqsauŋaruat niqinaqiviich.

¹¹ Qaiḷḷugu Ataniġmun God-ivsiññun suna unniqsuqłiisigiŋaguvsiuŋ ilaanun; aitchuutinik ilaanun qaġġirrisitchi unniqsuqłiisigiŋaravsiññik, iluqasi siḷalliġiiksuasii nunaqpauruasii. Ilaanun iñupayaam qiksigiraksraġiraŋannun;

¹² Atchiksiḷipkaġaġigaich irrusiŋi kamasaaġuuruat atanaurat; suli tatamaalapkallagaich kamanaqtuat umialgich nunami.