Psalms 75 - Iñupiatun Mumiksat Uqalugiksuat

God Isivġiqsiri

Atuqtit aullarriŋannun. Atuunmun “Maqunnagu.” Psalm aglaaŋa Asaph-gum. Atuun.

¹ Quyyavigigiptigiñ, God-auruatiin, quyyanmik qaitchirugut iliŋnun! Qanittuq Atqiñ. Quliaqtuaġigivut aliuġnaqtuat savaatin.

² “Piviksraq inillaŋagiga isivġiiñiksramnun,” uqaqtuq God, “suli isivġiiñiaqtuŋa atilugich iñuich nalaunŋaruakun.

³ Iñuggutiqapayauraqtuat uulillakpata suli nuna aulayyagluni, maŋŋuŋich nayummiñiaġitka.

⁴ Uqallautigitka pigiiḷḷiqiruat arguaŋŋatikun aŋalatchitquŋiḷḷugich;

⁵ Kamanniraaŋaiquvlugich uqallautigitka.”

⁶ Isivġiqtauniq qaisuitchuq kivalliġmiñ naakka avanitchianiñ, salliġmiñ naakka kiluliñaamiñ;

⁷ Aglaan God tavra ilaa isivġiqsi, anmuktiłługu naakka qutchiksipkaqługu iñuk.

⁸ Atanġum tigummigaa qallun; qinnautaa arriqaqtuaq suaŋaruamik wine-mik. Ilaata kuvigaa, aasii pigiiḷḷiqiraupayaaqtuat imiġaat, kusiġñauramik unnii iḷakugaluaġnagu.

⁹ Uqausiġiŋaiġumiñaitkiga God-iŋa Jacob; atuqtuaġluŋalu nanġautinik ilaanun.

¹⁰ Suaŋŋataiġñiaġitka pigiiḷḷiqirauruat, aglaan nalaunŋarualiqiruat suaŋŋaksaiññaġniaqtut.