Psalms 74 - Iñupiatun Mumiksat Uqalugiksuat

Aŋaiyyun Nunaqpak Annautitquvlugu

Poem aglaaŋa Asaph-gum.

¹ Summan imña suksraaŋavisigut inna, God-auruatiin? Summan qinnautiŋavigi tuavallaktiłługi imnait niġiñiaġvigñi?

² Itqaumalugich iñugiratin, piksraqtaaġiŋaratin iŋiḷġaan, tasutqiŋaratin kiŋuvaaġisukługich. Itqaumalugu Mount Zion, irvigisuuŋaran.

³ Pisuaġvigikkich isuitchuamun iniġruat; akiḷḷiġirapta maqunŋagaat sunapayauraq Aŋaiyyuvikpagmi.

⁴ Akiḷḷiitin nipaalaraqtut Aŋaiyyuvikpagmi; takuyyiqsuqłutiŋ akimanivḷutiŋ.

⁵ Qiññaqaŋarut qirriqiritun anauttamignik ulġuġairuatun napaaqtunik.

⁶ Navgulaaŋagaich qiruich sanaŋavlugich katchiḷiat anauttamignik kautamigniglu.

⁷ Ikipkaŋagaat Aŋaiyyupaiñ suksraunġiqł̣ugu; salumaiḷiŋagaat iliŋnun nanġaiviuruaq.

⁸ Uummatimigni uqaŋarut suksraunġiġḷavut tamatkiġḷugich; Nanġaiviuruat nunami God-mun ikipkaŋaniġaich iluqaisa.

⁹ Tautulaitchugut God-gum inniŋanik; God-im uqaqtiŋi piiŋammiut, aasii iñuitchuq iḷisimaruamik qanutun sivisutiginiaqtilaaŋa.

¹⁰ Qanutun imña sivisutigiruami, God-auruatiin akiḷḷiipta kipagiugaġniaqpatin? Suuŋiḷaġiniaqparruŋ atqiñ taimuŋa isuitchuamun?

¹¹ Summan ikayuġumaŋitkpisigut argagnik, taliqpigñik? Argaiñ qaliġuaġniñ ammuuŋ aasii suksraunġiġḷugich.

¹² Aglaan tavra ilvich umialigiŋagiptigiñ aullaqisaamiñ qaŋa, God-auruatiin; annautisuuŋagiptigut iñugiaktuani.

¹³ Suaŋŋatignik aviŋagiñ taġiuq suli siqummaaqługich taġium niġrułłuŋisa niaquŋich;

¹⁴ Ilvich siqummayaaŋammigitin niaquŋich niġrułłuum Leviathan-gum aasii niġipkautigivlugu timaa nunagluktuam niġrutiŋiñun.

¹⁵ Savaŋarutin maqsraluktuanik suvliktuaniglu; paliumaruaġuqtinŋammigitin kuukpaugaluaqtuat.

¹⁶ Uvluq pigigiñ, pigimmigintauq unnuaq; inillaŋammigikiñ siqiñiġlu tatqiġḷu;

¹⁷ inillaŋagitin killiksraŋich nunam; savaŋagikiñ upinġaaġlu ukiuġlu.

¹⁸ Aglaan itqaumalutin, Atanġuruatiin, akiḷḷiqpich kipagigaatin, isumalluaġiitchuat iñuich pisaaŋŋatikun suuŋiḷaġigaat atqiñ.

¹⁹ Unirruiññaġnagich iñuktin naglikkutaitchuanun akiḷḷiiŋiññun; piiguġnagich iluiḷḷiuqtitauruat iñugiratin taimuŋaaglaan!

²⁰ Qutchiksuaġipiallaglugu unniqsuqłiisigiŋaran. Qanukkii taaqtuaŋiññi nunam piaqłuktaqłiqsuagukkaqtuq.

²¹ Nagliksaaqtitauruat kanŋunaqsiḷiqtaupkaġnagich; iḷiappauruat suli piiḷḷiuqtuat nanġaġlirruŋ atqiñ.

²² Makinnaviñ, ilviñ God-auruatiin, sapunniaġuŋ sivuniġiran! Itqaumalutin isumalluaġiitchuat kipagiugaġaatin uvluqtutilaatun.

²³ Piiguġnagich saqłautiŋich akiḷḷiqpich, nipaalaugaqtuaġniŋat ataramik akiḷḷiġiraqpich.