Psalms 71 - Iñupiatun Mumiksat Uqalugiksuat

Aŋaiyyutaa Utuqqanaam

¹ Ullakkikpiñ, Ataniiq, qaunaġitquvluŋa; kanŋunaqsiḷiqtaupkaġniaġnaŋa!

² Ilvichkii nalaunŋaruagurutin; annauttuŋŋa; siutin tuŋimnuglugu anauttuŋŋa.

³ Uyaġagilakpiñ annaksaqtuġvigilutin, ataramik ullakkumiñaqtaġa; piraksriugguiñ annautisugluŋa, uyaġagigapkiñ suli annaksaqtuġvigivlutin.

⁴ God-iiŋ, annauttuŋŋa piḷuusiqiriniñ, suaŋŋataanniñ naglikkutaiḷaniñ piḷuktuaguvlutiŋ.

⁵ Qutchigniqsrauruatiin Ataniiq, niġiukkutiga ilignukkiga; Ukpiġisaqapkiñ imma nutauŋŋaġma.

⁶ Qiviaġvigivlutin iñuuniqtutilaamni inŋagikpiñ; munaġisuugigma aniñimniñqaŋa. Nanġaaġisaġataġniaġikpiñ iñiġlugu.

⁷ Iñuusiġa uuktuutaugaluamiiġaqtuq iñugiaktuanun, atakkiataŋ Ilvich suaŋŋatiqaqtuatiin annaksaġvigivlutin.

⁸ Qaniġa silivittuq nanġautignik, qaumaniġiñ uvlupaiqł̣ugu uqausiġivlugu.

⁹ Ayyaktuġniaġnaŋa uvva utuqqanaaġuġnimni; suksraaġnaŋalu piḷguiḷiñimni.

¹⁰ Akiḷḷiima tuqutchukkaanŋa; uqaqłutiŋ avanmun sivunniuqtut.

¹¹ Innaqhutiŋ, “God-im una suksraaġaa; maliqataġlugu aŋulakput; anniqsuqtiksraiñmiuq.”

¹² Uŋasiksivaiññak, God-auruatiin; God-iiŋ, qilamik ikayuġiaŋŋa!

¹³ Tamatkuatuq pasinniktuat uvamnik kanŋutchaktitaulich suksraaqtaulutiglu. Anniutiksraqsiuqtuallu uvamnik kanŋutchaktitaulich suli qiñiġviiqsitaulutiŋ.

¹⁴ Uvaŋaaglaan niġiukkutiqaqsaġataġniaqtuŋa iligni; Nanġaqsaġataġniaġikpiñ.

¹⁵ Uqautiginiaġiga nakuuniġikkaan; uvlupaiqługu uqautiginiaġiga annauriñ, nakuuruanik piqaġaluaqtillugu kaŋiqsiḷḷaramnik.

¹⁶ Iglauniaqtuŋa suaŋŋataagun Atanġum God-im; Siaminniaġiga nakuuniġiñ, kisivitualuk.

¹⁷ God iḷisautiŋagigma nutaunimniñqaŋa, uqausiġiŋaiyuitkitka aliuġnaġniŋat savaaqpiñ.

¹⁸ Pagmapak aasiuvva utuqqalikama qirġiukkaqsigamalu, iginnaŋa, God-auruatiin! Nayuŋŋa siamitchiñimni suaŋŋatignik kamanaqtuaguniġniglu iluqaiññullu kiŋuniġiigñiaqtuanun.

¹⁹ Nalaunŋaruaguniqpiñ God, qiḷak tikillagaa. Savaŋarutin aliuġnaqtuanik; piitchuq iliktun ittuamik.

²⁰ Iñugiaktuat iluiḷḷiuġutit nagliksaaġutillu apqusaaqtinŋagitin uvamnun, aglaan saŋŋisipkavsaaġniaġigma; tuquqqayaŋagaluaqtilluŋa, iñuupkaġniaġigma.

²¹ Ilvich kamanaqsiḷiqtaupkaġniaġigma atqunaq suli araaġivsaaġluŋalu.

²² Iḷumutun nanġaġniaġikpiñ atuqtuurautigillaġma nuqaqtiligmik; Nanġaġlugu iḷumutuuġniġiñ, God-iiŋ. Nuqaqtilimnik atuqtuuraġluŋa nanġautinik ilignun. Salumaruaŋanun Israel-gum.

²³ Nipaalaniaqtuŋa quviasuutikun qasalaaġniaqtuŋa quviasugluŋa ilignun— uvaŋa ilviñ annautiŋaran.

²⁴ Nivlirautiginiaġiga iluaqtuaguniġiñ uqamnik uvlupaiġḷugu, uvvakii tamatkua piyuumigiritka akiisitaurut kanŋusuunmullu ikurut.