Psalms 7 - Iñupiatun Mumiksat Uqalugiksuat

Aŋaiyyun Pitqiksiġautaitchuakun Isivġiutiqaqurivḷuni

Atuutaa David-gum Ataniġmun pisigivlugu Cush Benjamin-miu.

¹ Ataniiq, God-iiŋ, qairuŋa sapunniaquvluŋa; annautiluŋa anayanaitchuamuutitquvluŋa iluqaiññiñ pisaġinialarimniñ malikłuŋa,

² laiyaaluktun aullautiviaġaanŋa sumun imma anniqsuġviksraiḷaamun, taimmaasii ugiaġluŋa siquminmiḷuŋa.

^3-4 Ataniiq God-iiŋ, immaimña kimik pimaqłuiŋaguma, aitchuutiginniŋaluŋa avilaitqatimnik naakkaqaa patchisiksraitkaluaŋŋaan pimaqłukkupku akiḷḷiġa; nalliatigun taapkua pimaqłuktaimaguma,

⁵ tainnaġuma akiḷḷiima maliqataġluŋa aŋuliñŋa, ilaisa payariḷuŋa aasii naniġvaktuġluŋa nunamun tuqulliñŋa aasii uniḷḷuŋa tuquŋaraq tamauŋaiññaq nunamun!

⁶ Makittin qinnaliġutin, Ataniiq! Makivsaallautikkich qinnaliqsuat akiḷḷiitka; maksriutilugich ikayuŋŋa! Pitqiksiġautairrutiqaqurirutitkii,

⁷ kiami iñupayaat atautchimuktitkich avatigniittuat, aasii atanniqsuġlugich pagmaŋŋa;

⁸ Ilvich isivġiqsaurutin iñupayaanun. Isivġiigguiñ iviġaumanaqtuamik uvapkun, Ataniiq; iḷisimagigmakii patchisaisilaamnik.

⁹ Ilvich kii iluaqtuaguvlutin God-aurutin qanuġitilaaġaġigitin isummativullu uummativullu, Nutqaqtitkich piaqłuktautiŋich pigiitchualiqirit suli iluaqtualiqiruat navianniuqtinŋaiġḷugich.

¹⁰ God sapunniaqtigigiga; annautisuugai iliŋich inmiñik kamaksriruat.

¹¹ God iluaqtuaguruakun isivġiisuuruq God-auruam qiñiġnaqtittaġigaa qinnautini uvlutuaġman.

¹² Allaŋŋuŋisuaġmata piḷġutchimigniñ, God-im ipiksaġniaġaa savikpagikkani. Qilulugulu pisiksiñi pisiksaqsiññaaġuġlugu;

¹³ paġnasiġaich aŋuyaunnani iñuaġuuruat iiggutivlugiḷḷu ikualaruat qaġruni pisiksimiñiñ.

¹⁴ Qanutun uvva iñuich isumallatigivat pigiirrutinik; sivunniuqhutiŋ isumaalugnanik iḷisaqługulu saglutautiksraqtiŋ.

¹⁵ Aglaan iḷuqsraliamignun allanun iliŋich katagaqtut.

¹⁶ Tatavsaqtauraqtut ilaisa pigiiḷḷiqunmignun. Anniqsauvlutiŋ piaqłuktautimiktigun.

¹⁷ Quyanaaġiga Ataniq pitqiksiġautairrutaagun; Atuqtuŋa nanġautinik Ataniġmun, qutchigniqsrauruamun.