Psalms 69 - Iñupiatun Mumiksat Uqalugiksuat

Ququullan Ikayuquvluni

Atuqtit aullarriŋannun. Atuunmun “Lilies-tigun.” David-kun.

¹ Annauttuŋŋa, God-auruatiin! Imiq marra quŋusimñuaglaaqtuq;

² Muġrukłuŋa itiniŋanun aqiyam, tutiraksraiñmiuq payaŋaipayaaqtuamik; Sarvaqtuŋa itiniŋanun immam, qaiḷḷium ipinnialagaaŋa.

³ Iñiqtullaktuŋa nipaalagaluaqłuŋa ikayuquvluŋa, iggiaġiiḷiqamauvva. Piḷaiŋaruk irraka, qiñiġniuraqpaił̣ł̣utin ikayuqugaluaqłuŋa ilignun.

⁴ Uumikłiqsuat uvamnik patchisaitkaluaŋŋaġmiŋ iñugiałhaaqtut nutchamniñ. Akiḷḷiima sagluuġutigiraġigaanŋa; suaŋałhaqhutiglu tuqutchumavluŋa. Utiqtitchipkaqłuŋa sunik tigliŋaitkaluaqtilluŋa.

⁵ Nanmiñiq piḷuusiqiatka, God-auruatiin, iriqsimaŋitchut iligniñ; iḷisimammigigma qanutun isumalluaġiiñŋatilaamnik.

⁶ Ataniiq, Ataniq Sapiġñaqtuatiin, niġiuktuat ilignik kanŋunaqsiḷiqtauŋiḷḷittuq pisigiluŋa, God-iŋa Israel-gum, ivaqłiqtuattuq ilignik kanŋunaqsiḷiqtauŋiḷḷit pisigiluŋa.

⁷ Ilvich pisigivlutin tavra pisaaŋŋasiaqaqtuŋa, matuŋaruŋa kanŋunamik.

⁸ Iglaatun iḷiuġaanŋa aniqatiigma iḷamnun, iḷiuqłuŋa allaniñ nunaniŋŋaqtauruatun qitunġamnun.

⁹ Siġñiksrautiqpaum Aŋaiyyuvikpagnun payarigaaŋa; uqamaqłuktaqtuat ilipkun uqamaqłuktaġvigiŋagaanŋa uvaŋałhaaq.

¹⁰ Qirrukkamalu niġiŋaiḷaqamalu, igḷutuqtuksraġigiga kipaksriñiq;

¹¹ Annuġaaqtuqtuŋa isumaaqtuam atuġuuraŋiññik, aasii iglautigigaanŋa.

¹² Uqautigigaanŋa upkuaqpaŋmi, imiŋarat unnii tamarra atuusisigivluŋa.

¹³ Uvaŋaaglaan, aŋaiyyuviginiaġikpiñ, Ataniiq; Kiuŋŋa, God-iiŋ, piviksran nalautitpan. Kiuŋŋa pisigilugu ilvich kamanaqtuaq nakuaqqutin, nalautitchuugitinkii unniqsuqłiutitin annautiniaġnivḷugich.

¹⁴ Anniqsuŋŋa aqiyamiñ; kivipkaġnaŋa; Annauttuŋŋa uumigirimniñ, itiruaniñḷu immaniñ.

¹⁵ Ulittuamun matupkaġnaŋa; ipipkaġnaŋa itiruami naakka kiviriñaŋa iḷuġsramun.

¹⁶ Kiuŋŋa, Ataniiq, nakuaqqutin nuŋusuiḷaaq pisigivlugu; kamanaqtuami naglikkutikkun qiviaŋŋa!

¹⁷ Iriġnagu kiiñan kivgaġniñ; Uvvaataŋ atqunaq iluiḷḷiuqtuŋa akkupak kiuŋŋa!

¹⁸ Qalliḷaaġiñ annautiluŋaasii; annautiluŋa akiḷḷiimniñ.

¹⁹ Iḷisimarutin qanuq kipagipkaġniaqtilaaġa, kanŋunaqsiḷiqtautilaaġa suli anmuqsruqtautilaaġa; qiñiġitin akiḷḷiipayaatka.

²⁰ Pisaaŋŋatauruat uummatiga navikkaat. Nikatchalipiallaŋaruŋa. Niġiukkaluaqtuaŋaa naglikkusiaksramnik, aglaan nagligiraitchuŋa; arausiaksramik, aglaan paqinŋitchuŋa.

²¹ Kaakkama, tuqunaksriñŋagaanŋa; Imiġuliqama, vinegar-ksriñŋagaanŋa.

²² Niġġiviŋattuq nigatchiatun iḷili; tatavsautaulittuq katagvigiḷugulu iñuusimigni.

²³ Ayaupkakkich! Tunuŋich sayaiqsaulich iñiġlugu!

²⁴ Qiñiqtitkich ukua qinnautignik! Pisigivlugu qinnautiqpaiñ, maliqatakkich aŋulugiḷḷu.

²⁵ Aullaaġviŋittuq iñuiġutilich; atautchimik unnii iñuuruagiġutiŋ tupiŋich.

²⁶ Suuyuaġiññiktutkii tatavsakkaġniik; uqaġigaich nagliksaaġnivḷugich ilvich ikiḷḷiiratin.

²⁷ Agliusimaugaġlugich piḷuusiqiapayaaŋich; iḷaksruutipkaġniaġnagich ilvich annautiksrirrutignun.

²⁸ Atiŋittuq piiqsauḷich makpiġaaŋiñiñ iñuuruat; iḷauŋiḷḷittuq aglausimaruaniñ nanmiñiq iñugniñ.

²⁹ Uvaŋaaglaan kiiqsiuqtuŋa qanusausiiqłuŋalu; kiviŋŋa, God, annautiluŋalu!

³⁰ Nanġaġniaġiga God-im atqa atuunmik; Qutchiksuaġivlugu quyanaaġiga.

³¹ Taaptuma iviġagniaġaa Ataniq nuimaruaġilugu pamiqsaaniñ unnii aitchuutauruaniñ, nuimałhaaqtuaġilugu aitchuutauruamiñ aglianiŋaruamiñ aŋusallumiñ.

³² Nagliksaaqtitauruat tautukkumirruŋ, quviatchagniaqtut; nanġairuat God-mik qapiŋaivsaaġniaqtut.

³³ Atanġum naalaġnisuugai piiḷḷiuqtuat suli puiguumasuitkai iñuni tigutaaqtauruat.

³⁴ Qiḷauvlu nunavlu nanġaġlirruŋ God, taġiullu taġiumiittuapayaallu.

³⁵ Ilaan annautiniaġaa Jerusalem nappaitqigḷuniḷu nunaaqqiŋiññik Judah-m. Ilaan nanmiñiq iñuŋisa iñuuviginiaġaat nunagilugulu;

³⁶ kiŋunġuruat God kivgaŋiñun kiŋuvaannaktaaġiniaġaat nuna, aasii ilaanik nakuaqsriruat tavrani iñuuniaqtut.