Psalms 68 - Iñupiatun Mumiksat Uqalugiksuat

Atuutaat Akimmatikun

Atuqtit aullarriŋannun. David-kun. Psalm. Atuun.

¹ God-tuq makilli, siavyaaqtitaulich akiḷḷiiŋich. Uumisuktuat ilaanik qimaglich ilaaniñ.

² Avyuq tiŋinmatun, tainnaptauq aullaqtillammigai; patiquraliaksratun auguuruatun ikualaruam sivuġaanugman, tainnaptauq piḷuusiqirit suksraaqtauniaġmiut sivuġaanukkumiŋ God-im.

³ Ił̣uaqtualiqirilliaglaan qaamasuutiqaqtut quviasuktuaqhutiglu sivuġaani; quviasukpakhutiŋ tautuktittaġigaat quviasuutiktik.

⁴ Atuuttusiuŋ God, atuġitchi nanġaġlugu atqa; itqanaiyautisiuŋ usiaqsiqsuaq nuviyatigun. Atqa Ataniq—quviasuutiqaġitchi sivuġaani!

⁵ Aapauruaq aapaitchuanun, munaġiri uiḷgaŋaruanun, God-auruq salumaruami inimiñi.

⁶ God-im aliasuktuaq aimmaviqaqtitkaa iñuuniaġviksraŋanik. Sivulliuġaġigai tigutaaqtat quviasuktut tigurauŋaiqamiŋ, paaqłaŋarilliaglaan iñuuruksraurut uunapiaġataqtuami nunagluktuami.

⁷ God-iiŋ, aullatikapkich iñuktin, avluġaaqługu ikaaqavsiuŋ nunagluktuaq,

⁸ nuna aulaliqtupiaŋaruq, aasii qiḷagmiñ kuviŋaruq sialugmik, saaŋanun God, Ilaaguruaq Sinai-mun, saaŋanun God-im, God-iŋa Israel.

⁹ Atqunaqługu ilvich sialuktinŋagiñ; utiqtitinŋagiñ nuŋuqsruŋaraq nunaksi;

¹⁰ iñukpich aasii taamna aimmavigiliutivlugu; nakuutigni inuqtuqtinŋaitkitin iḷiappauruat.

¹¹ Ataniq uqaġman; iñugiaktuat aġnat tusaayugaalluataq siamitkaat:

¹² “Umialgich marra aŋuyaktitiglu qimaktut!” Aġnat aimmiuqtuat autaaŋagaich piññaktaatik.

¹³ Tigmiaŋŋuat piḷiaguruat manigmiñ qatiqtuamiñ, isaġuŋich qivliatitaġmiut manigmiñ kaviqsaalluatamiñ. (Summan immaimña iḷasi akunġanniqsiuŋavat imnaiqaġvium aŋuyaksaġvivsiññi?)

¹⁴ Taimaniusii Sapiġñaqtuam God-im siavyataġimmagich umialguruat Mount Zalmon-mi, qannikł̣uktuatun inŋaruq tavrani.

¹⁵ Qanutun uvva Mount Bashan kamanaqtigiva, iġġiq iñugiaktuanik nuvuluqutalik!

¹⁶ Summan qiñiġruaqpiñ tusullaqpich iġġiqłuuruatiin, iġġimi God-im naliġaktaŋani umialgusukłuni? Atanġum iñuuviginiaġaa isuitchuamun!

¹⁷ Iñugiapiaġataqtuanik kisiññaitchuanik suaŋaruaniglu aksraktuuraqaġluni Ataniq qairuq Sinai-miñ salumaruamun inimun.

¹⁸ Mayuqami qiḷaŋmun, tapurrivḷuni iñugiaktuanik tigutaaqtanik; akuqtuisuuruq aitchuutaiññik iñuich, paaqłaŋaruaniñ unnii— Atanġuruam God-auruavlu irviginiaġaa iñuuvigilugu.

¹⁹ Nanġaqtauli Ataniq, tigumikataqtuaq uvlutuaġaġimman uqumaiḷḷiraaptignik; ilaa God-auruaq annaurriruaq uvaptignik.

²⁰ God-ikput God-auruq annaurrisuuruaq; Atanġuvluni, Ataniqput, annautigaatigut tuqqunmiñ.

²¹ God-im iḷumutun niaqquaġniaġai akiḷḷiiñi, sivunmuuruat piḷuusiqunmigni.

²² Ataniq uqallaŋaruq, “Uvaŋa utiqtinniaġitka akiḷḷiitin Bashan-miñ; utiqtillugich qutaiḷaŋaniñ taġium,

²³ ipiġaaqtuaġumautin ilaisa auŋanni, qimmivich aluguiqsuaġvigilugu iḷaŋaniiqsuaġlutiŋ.”

²⁴ Ilvich God, avluġaaġutaa akimmarvich iluqaġmiŋ tautukkaat, aquliġaġiiksuaqhutiŋ maliktuat God-mik, uvaŋa umialimnik, aŋaiyyuvianun isiuraaqhutiŋ.

²⁵ Atuqtit sivulliurut, atuqtuurriraqtit tugliuvlutiŋ, qitqanniasii niviaqsiat qiḷausiraqtuat argamignik.

²⁶ “Nanġaqsiuŋ God katirvianni Ilaan iñugiraŋisa; nanġaqsiuŋ Ataniq, iluqasi kiŋunġuruasii Israel-mun!”

²⁷ Sivulliġigaich Benjamin, iñugiakiññiqsrauruam kiŋuniġiipayaaniñ, tugliġivlugich aullarrauruat Judah-mun iḷatiglu, tugliurut aullarriŋich Zebulun Naphtali-lu.

²⁸ Qiñiqtirruŋ suaŋŋatin, God-auruatiin, suaŋŋan atuġuukkaan uvagut pisigivluta

²⁹ aullaqivlugu Aŋaiyyuvikpagniñ Jerusalem-miittuamiñ, umialgich aitchuutinik qaġġirriñiaqtuat ilignun.

³⁰ Suaguŋ Egypt, taimña niġrun ivigruat akunġanniiłłuni; suakkich nunaqpauruat, aŋusallusalaich nuġġaliraqtuat, iluqatiŋ pulġataqtillugich aasii ilaisa maniutimignik qatiqtuanik aitchuiḷġataqpata. Siamitkich aŋuyallaturuat!

³¹ Naliġaktaaġiratik aggiġñiaqtuat Egypt-miñ; Ethiopia-ġmiut isaaġutiniaġaich argaktiŋ aŋaiyyuvigilugu God.

³² Atuutisiuŋ God, umialguruasii nunami, atuġitchi nanġaġlugu Ataniq,

³³ ilaanun usiaqsiqsuam qiḷagmi, aippaaniqsami qiḷagmi. Naalaksiuŋ saqłaktuaq nipatuvluni.

³⁴ Nivlirautigilugu God-im suaŋŋataa; qutchiksuaguniŋata qulaŋiqsimaaġaa Israel, suaŋŋataa qiḷagmiittuq.

³⁵ Ilviñ God-auruatiin, kamanaqłutin qiksiginaqtutin aŋaiyyuvigñi. Israel-gum God-iŋa qaitchisuuruq sayaksramik suaŋŋanmiglu iñugmiñun. Nanġaġli God!