Psalms 66 - Iñupiatun Mumiksat Uqalugiksuat

Atuun Nanġaun Quyyanmullu

Atuqtit aullarriŋannun. Atuun. Psalm.

¹ Nanġaqsiuŋ God avaalauġlusi quviasukpaiḷḷusi, iluqasi iñuich!

² Atuġlusi qutchiksiḷiġlugu ilaan atqa; nanġautaa kamanaqtuaguli!

³ Uqallauttuuŋ God, “Qanutun aliuġutchagnaqtigirut sut ilvich savaatin! Suaŋŋatinkiuvva kamanaqpaił̣ł̣uni akiḷḷiitin unnii uulillarut sivuġaġni iqsivaił̣ł̣utiŋ.

⁴ Nunamiittuapayauram purvigigaatin; atuġaqtut nanġaqłutin, atuqhutiŋ nanġautinik ilvich atiġnun.”

⁵ Qaiḷusi tautugiaqsigigli God-im savaaŋi, aliuġnaqtuat savaaŋich akunġanni iñuich.

⁶ Mumiŋagaa taġiuq paliumasivḷugu nunaraatun; maŋŋuupta ikaaġvigiŋagaat kuuk pisuaqłutiŋ. Tavrani quviasukta ilaani.

⁷ Atanniqsuiruq isuitchuamun suaŋŋanmigun naipiqtuġaich nunaqpaich. Paaqłaguguuruat akiḷḷiqsruŋiḷḷirruŋ.

⁸ Nanġaqsiuŋ God-ikput, iñupayaat; nanġaġniŋa tusaġnaġli.

⁹ Ilaankii iñuupkaġaatigut isigavut quayaqitchaiḷivḷugich.

¹⁰ Ilvich uuktuanikkiptigut, God; salummaŋagivsigut qatiqtuatun maniktun.

¹¹ Ilvich kataktitkivsigut napirvigmun uqumaiḷḷiraaksriġmivḷuta nanmaktaptignik.

¹² Ilvich tugmalugipkaqłuta akiḷḷiiptignun; apqusaaġikput igniq ulittuaġlu, pagmapak aglaan navianaitchuamuutigiptigut.

¹³ Aitchuiñiaqtuŋa ikipkautimnik iglugnun; Taŋŋiqsinniaġitka unniqsuqłiutigiratka iliŋnun.

¹⁴ Qaiññiaġiga uqallautiptun qaiññiaġnirautiga iłuiḷḷiuġama.

¹⁵ Ikipkaiñiaqtuŋa imnaiñik ikipkaivigmi; Aitchuiḷuŋa aŋusalluġruanik nagruligniglu, avyuq aasii qiḷagmuaglaaġuni.

¹⁶ Qaiḷusi naalaġniyyaġiaġitchi, qiksikkutiqapayaaqtuasii God-mun, uvaŋa itqautiyumagivsiḷi qanuq savaŋatilaaŋa uvamnun.

¹⁷ Qiññuaqtuġvigigiga Ilaa ikayuquvluŋa, nanġautaa uqamniinŋaruq.

¹⁸ Piiḷaaġiŋamagupkich piḷuusiqiatka, Atanġum naalaġniñiaŋiñŋagaluaġaaŋa.

¹⁹ Aglaan God-im naalaġniŋagaaŋa; tusaaŋagaa aŋaiyyutiga.

²⁰ Nanġaġiga God, uvvaataŋ ayyaktuutaitchuq aŋaiyyutimnun naagga nunummisuitkaa nuŋulaitchuaq nakuaqqunni uvamniñ.