Psalms 64 - Iñupiatun Mumiksat Uqalugiksuat

Aŋaiyyun Qaunagitquvluni

Atuqtit aullarriŋannun. Psalm aglaaŋa David-gum.

¹ Naalaġniŋŋa, God-iiŋ, tusaagguuŋ uqaallatiga! Iqsigigitkauvva akiḷḷitka—annauttuŋŋa!

² Munaġiŋŋa sivunniuġutiŋiññiñ piḷuusiqirit, iñugaaġrugniñ pigiiḷḷiqirauruaniñ.

³ Ipiksaqługich uqqatiŋ igḷuktuuliktun aasii iigusimavluŋa uqalugiiḷanik qaġruġiruatun.

⁴ Siamitchisayarut kanŋunaqtuanik sagluuġutinik; maqutchisuurut iñulluatanik saŋułługich asiñik.

⁵ Siimasaaġutivlutiŋ avanmun pigiitchuanik sivunniuġaqtut; uqaqhutiŋ sumun naniġialiqsuutiksramignik. “Qiñiġnaġniaŋitchut,” uvva uqaluat.

⁶ Sivunniuġamik pigiitchuanik uqallagaqtut inna, “Sivunniulluataqtugut naamaruamik iḷitchuġinaġumiñaitchuamik pimaqłuunmik.” Iñuum uummataa isummataalu nalunaqtuk.

⁷ Aglaan God-im pisiktaġniaġaich, aasii tavraŋŋatchiaq akiiḷiñiaġaich.

⁸ Ilaata suksraunġiġñiaġaich uqaluat pisigilugu; qiñiqtiŋisaasii niaqulaaġutiginiaġaich.

⁹ Iluqaġmiŋ iqsitchagniaqtut; isumalaaġutiginiaġaich God-im nalautittaŋich aasii uqausiġilugich savaaŋich.

¹⁰ Iluqaġmiŋ nalaunŋarualiqiruat quviasugniaqtut pisigilugu Atanġum savaaġiraa. Ilaani paqinniaġaat navianniuġnaiḷaaq; iluqaġmiŋ nalaunŋarualiqiruat nanġaġniaġaat.