Psalms 63 - Iñupiatun Mumiksat Uqalugiksuat

Inuġrugivlugu God

Psalm aglaaŋa David-gum, nunagluktuaŋaniinnami Judea-m.

¹ Ilvich God, God-igigikpiñ, aasii inuġrugigikpiñ. Ilitqusiġma kipiqqutaġigaatin; arriqaqłuni nunagluktuatun imġiḷami, timigauvva ittuq imiġuliqpaktuatun ilignik.

² Tautuglakpiñ salumaruami aŋaiyyuvikpagmi; tautugluguasii qanutun kamanaqtilaan suli qutchiksuagutilaan.

³ Nuŋulaitchuaq nakuaqqutin nakuułhaaqtuq iñuggunmiñ unnii, tainnamik qaqłuŋma nanġaġniaġaatin.

⁴ Quyanaaqtuaġniaġikpiñ iñuuniqtutilauraptun; isaaġluŋa ilignun aŋaiyyuviginiaġikpiñ.

⁵ Iḷitqusiġa niqinaqiniaqtuq pisuġuiqsuaġluni, suli atuġluŋa qaqłupkun atuutinik quvianaqtuanik nanġautinik.

⁶ Tuttaaŋallaġma, itqaġuugikpiñ; unnuaqtutilaatun isumagisuugikpiñ,

⁷ ataramikkiataŋ ikayuġuugigma. Taġġisimaaqłuŋa isaqqugniñ atuġaqtuŋa quviatalaaqłuŋa.

⁸ Tigummirapiallakkikpiñ, aasii taliqpiuruam argakpiñ anayanniuqtinŋitkaaŋa.

⁹ Tuqunnialaritka nunaŋannugniaqtut tuquŋarat.

¹⁰ Tuqutauniaqtut aŋuyaktuani, aasii timiŋich niġiñiaġaich jackals.

¹¹ Atakkii God-im akimmasiqł̣ugu, umialik quviasugniaqtuq. Tamatkua unniqsuqłiiruat God-im atqagun nanġaġniaġaat, qaniŋich aglaan sagluturuat nipaiqsitauniaqtut.