Psalms 62 - Iñupiatun Mumiksat Uqalugiksuat

Nalupqisuutairrun God-miñ Munaqqusiaqaqtilaaq

Atuqtit aullarriŋannun, Jeduthun-mun. Psalm aglaaŋa David-gum.

¹ Ilitqusiġa unaŋuiqsuaġuuruq God-mi kisian; Annautiga ilaaniñ qaiŋaruq.

² Kisimiataŋ qaunaksriga annautivluŋalu; ilaa anniqsuqtiga, akiisitauyumiñaitchuŋa.

³ Qakuguaglaan immaimña piyukłiġñiaqpisi allanik suaŋŋataiñmipkaqługich unnii ulġusiññaaguruatun?

⁴ Uvva anmuksruġniataksiññaġiñ qiksigñaqsisaaniñ; qaamasuuttaġigitin sagluuġutit. Uqaluktin quviasaaġutaugaluaqtut, qammaaglaan uummatigni uqamaqłuun.

⁵ Iḷitqusiġa unaŋuiqsuaġuuruq God-mun kisian; niġiukkutiga ilaaniñ qaiŋaruq.

⁶ Kisimiataŋ qaunagigaaŋa annautivluŋalu; ilaa anniqsuqtiga, akiisitauyumiñaitchuŋa.

⁷ Annausiaqaġviga suli qiksigñaqsiñiġa tunŋaruq God-mun; suaŋŋaruq qaunaksriga; ilaa annaksimaaġviga.

⁸ Ukpiqqutiqaġitchi God-mik ataramik, iñugiramaaŋ. Uqautilugu iluiḷḷiuġutipayaaġnik, atakkii annaksimaaġvigigikput.

⁹ Iñugruiññaich makua arriqaqtut aniġniġruiññatun; kamanaqtuat kamanaitchuallu atunim suuŋiḷatun ittut. Uqumaisilaaqtumunnii suuŋitchut; uqił̣haaqtut unnii aniqsaaġniłhiñauramiñ.

¹⁰ Tunŋaviginagu qinnałłaktaġniq; suġallagniaġnasuginak tigligaġlutin; umiallakkaluaġuvich unnii, tunŋaviginagich umiallaktaatin.

¹¹ Atausiuŋitchuami God tusaagiga uqallagman suaŋŋan ilaata piginivḷugu

¹² suli nakuaqqutaa nuŋulaitchuq. Ilvich ilignik, Atanġuruatiin, akiḷitchuugiñ kiñapayaaq savaaŋisigun.