Psalms 60 - Iñupiatun Mumiksat Uqalugiksuat

Niġiukkutiqaquvlugich God-mun

Atuqtit aullarriŋannun. Atuunmun “Sivunniuġutim Lily-ŋa.” Psalm aglaaŋa David-gum, iḷisaurrutausaqługu, aŋuyakkamigich Aramean-gich Naharaim-miut suli Zobah-miñ, aasii Joab utiġman suli tuqułługich 12,000-gich Edomite-gich Salt Valley-mi.

¹ Ilvich ayyaŋagivsi, God-auruatiin, akiisinmivḷuta; uumitchautiŋagivsigut tavraasii nutaqsaġsigut.

² Nuna aulayyaktinŋagiñ, agmaqtaallaan; aasii quppat iluaqsruġlugich, uvvakii katagaaliqsuq.

³ Iñuktin nagliksaaqtipalukkitin atqunaqługu; sanipaktuġaaliqaptauvva wine-tuqtinŋavluta.

⁴ Kiliktuŋagaluaġitin qiksiksrautiqaqtuat ilignun, annaqugaluaqługich kii tavra suksraunġiutiksraŋanniñ.

⁵ Annautisigut suaŋŋatignik; kiulugu aŋaiyyutikput, iñuich nakuaġikkatiin annaurrauyumaut.

⁶ Salumaruamiñ inimiñiñ God uqallaŋaruq, “Akimmatimni aviktuaġniaġiga Shechem aasii autaaġlugu Sukkoth Valley uvaŋa iñugiramnun.

⁷ Gilead uvaŋa piutiga, Manasseh-lu; Ephraim tavra niaqquaqsaiḷutaġa Judah-liasii atanniqsimakama tikkuaġautiga.

⁸ Aglaan Moab iqaqqiviuraġiniaġiga, aluġutimnik aasii miḷuqsaġvigilugu Edom, iḷitchuġiyumaut uvamnun pigitilaaŋigñik. Philistia-ġmiut avvaapkua isummatiqaqpat avaalauġniaġnasugivlutiŋ akimaniḷutiŋ uvapkun?”

⁹ God-auruatiin, kia uvva aullatiniaqpaŋa sapukusiqsuŋaruamun iniqpagmun? Kia sivulliuġniaqpaŋa Edom-mun?

¹⁰ Tavraimña ayyaŋavisigut, God-auruatiin? Avluġaaqasiġñiaŋitpigich unnii aŋuyaktivut?

¹¹ Ikayuqsigut akiḷḷiptigniñ; iñugruiññaum ikayuutaa naamaitchuq.

¹² God iḷaaluġiguptigu akimaniaqtugut; ilaan akiisinniaġaich akiḷḷivut.