Psalms 59 - Iñupiatun Mumiksat Uqalugiksuat

Aŋaiyyun Navianniuġuŋił̣ł̣uni

Atuqtit aullarriŋannun. Atuunmun “Maqunnagu.” Psalm aglaaŋa David-gum, Saul tilisianigman aŋutinik naipiqtuquvlugu David igluŋa tuqutchukługu.

¹ Annauttuŋŋa akiḷḷiimniñ, God-iiŋ; Sapunniaŋŋalu maksrigvigirimniñ!

² Annauttuŋŋa piḷuktuaniñ iñugniñ; iñuuliŋŋa iñuaqtuqtiniñ!

³ Tautukkich! Utaqqigaanŋa tuqutchukłuŋa; taluqsralliaġinniktuaqtuat katittut akiḷḷiqsruqłuŋa. Piḷuksisipkun piŋitchut killuliqutigalu pisigiŋitkaat Ataniiq,

⁴ naakkaunnii pasiraunipkun, akiḷḷiitka itqanaiyaqtut akisaġukłuŋa. Makittin, ikayuġiaŋŋa; qiñiġutin anayyaniuġnimni,

⁵ Ataniq God Qutchigñiqsrauruatiin, God-auruatiin Israel-miunun! Iqiiġutin tatavsakkich ukpiŋaitchuat; nagligiŋaiġḷugich pigiitchuakun aitchuutiginniktuat!

⁶ Utiġaqtut anaqamman, ugiallavlutiŋ qimmisun iniqpagmiqsiullaġmiŋ.

⁷ Naalakkich pisaaŋŋataich sivuuġasaaġutaiḷḷu. Uqaŋich marra ittut igḷuktuuliktun qaniŋanni, naakka marra isumaraqtut kisupayaamun tusaalaiññasugilutiŋ.

⁸ Iglautigisuugitin aglaan ilvich, Ataniiq; kipagisuugitin ukpiŋaitchuapayaat.

⁹ Suaŋŋatigigikpiñ, utaqqiñiaġikpiñ; Uqqisimaaġvigigikpiñ, ilvich God-auruatiin.

¹⁰ God-igma nakuaġigaaŋa aasii ullagniaġaaŋa; Qiñiqtuaqtinniaġaaŋa akiḷḷitka akiisititaukpata.

¹¹ Tuqunnagich, ilvich God-auruatiin, iñutka puiguŋitchumaut. Siamitkich suaŋŋatignik aasii akiisillugich, Ataniiq, uvaptignun munaqsriuruatiin.

¹² Uqallakkamiŋ piḷusiraqtut; uqalupayaaŋich aasii siḷivinŋarut piḷuusiqunmik; aŋuraulich kamasaaġunmigni! Atakkii uqaluŋich suaŋŋatiqaqtut taŋŋiġumiñaqługu ił̣uirrutiqpak akiḷḷimignun,

¹³ suksraakkich makua qinnautilugich; suksraunġipiallaglugich. Kisupayaam iḷitchuqqutigiyumagaa God atanniqsuitilaaŋa Israel-mi, atanniqsuiñiŋalu iluqaaniitilaaŋa nunapayaamun.

¹⁴ Akiḷḷiitka utiġaqtut anaqamman, ugiallavlutiŋ qimmisun iniqpagmiqsiullaġmiŋ,

¹⁵ arriqaqtut qimmich kukiḷuktuaqtuatitun niqiksraqsiulavlutiŋ ugiaġumaugaqtuatun niqaiḷḷiuġniġmigni.

¹⁶ Uvaŋaaglaan atuutigiugaġniaġiga ilvich suaŋŋatin; uvlaatuaġaġikpan nipatusiḷuŋa atuutugilugu quviasuutikun nuŋulaitchuaq nakuaqqutin. Ilvich qanuq annaksimaaġvigivlutin, ini anayanaitchuaq iłuiḷḷiuġnimni,

¹⁷ Nanġaġikpiñ, suŋŋatigivlutin. Qanuk ilvich, God-auruatiin, annaksimaaġvigigikpiñ. God, nakuaqqutiqaqtuaq nuŋulaitchuamik uvamnun.