Psalms 58 - Iñupiatun Mumiksat Uqalugiksuat

Aŋaiyyun God-mun Tatavsaquvlugich Piḷuktuat

Atuqtit aullarriŋannun. Atuunmun “Maqunnagu.” Psalm aglaaŋa David-gum.

¹ Atanaurauruasii sivunniuġaluaqpisi nalaunŋaruakun? Isivġiqsisuuvisi atisivḷugich iñupayaat?

² Naumi! Isummatigisiññaġuugiksi piaġiirrutiksraqsi, pimaqłuktaqłusi maqurrutiksraŋanik nunam.

³ Piḷuktualiqirit killukuaqtaġuurut iñuuniqtutilaamiktun; sagluurraqsiŋarut aniḷuqqaaqtumiglu.

⁴ Siḷivinŋarut tuqunamik nimiġiatun; simiktuġuugaich siuttatiŋ tusaalairrusiatun tuqunaligum nimiġiam,

⁵ tusaasuitkaich unnii qaivaksautikkaluaŋit nimiġianun, pisuqtilauraġaluaġli.

⁶ Navgikkich kigutiŋich makua iqsiñałaich laiyaqpaich, God-auruatiin.

⁷ Qiñiġnaiḷḷaktut imaq maqivluni nuŋullaktuatun; tuŋmaluktaulutiglu nauriaġiitchuatun apqugaatchiani.

⁸ Aalumiututtuq auli nuŋullaguuruatun; arriqaġlitchuq tuqaŋarriatun qiñiŋaitchuamik qaummaġmik.

⁹ Puttuqsriŋaigsillugich-suli, kipirauraqtut nauriaġiitchuatun; Qinnautiqpagmiñi God-im suksraunġiñiagai iñuuguraġniaqtillugich.

¹⁰ Iluaqtualiqirit quyaniaqtut piḷuusiqirit tatavsaqtaukpata; Ipiġaġniaqtut auŋisigun piḷuusiqirit.

¹¹ Iñuich uqallakkisirut, “Iḷumutuuqtuat akiḷiusiaqapiaqtut; God-iqapiallaktuq iḷumun isivġiiruamik nunami.”