Psalms 57 - Iñupiatun Mumiksat Uqalugiksuat

Aŋaiyyun Ikayuquvluni

Atuqtit aullarriŋannun. Atuunmun “Maqunnagu.” Psalm aglaaŋa David-gum, qimaaganiŋamman Saul-miñ qaiġusugmun.

¹ Naglikkutiqaġiñ uvamnun, God, nagligiŋŋa, ilignuktuŋakiuvva annaksaqłuŋa. Taġġisimaaqama isaqqugni anayanniulaitchuŋa anayanaqtuaq qaaŋiġataqtillugu.

² Ququulagiga God, Qutchigñiqsrauruaq, God-mun, naamasipkairuamun pigiraksrapayaamnik.

³ Ilaata kiuniaġaaŋa qiḷagmiñ aasii annautiluŋa; akiisinniaġaich nagliksaaqtitchiritka. God-im maniuġniaġaa uvamnun nuŋulaitchuaq iḷumutuuġniñi nakuaqqutiniḷu.

⁴ Avatkaanŋauvva akiḷḷiima, laiyaqpaktun iñuktuqsiññaatun. Panatullu qaġruŋisullu pisiksit kigutiŋich ittut; uqaqaqtut ipiktigiruanik igḷuktuuliktun.

⁵ Tautuktirruŋ kamanaqtilaan siḷami, God-auruatiin, suli kamanautin nunapayaamiḷu.

⁶ Akiḷḷiitka isivitchiŋarut kuvraġukkaluaqłuŋa; qanuqsausiiġaanŋauvva iluiḷḷiuġutit. Nivaktut mitaiḷamik putumik apqutimnun, iliŋisaaglaan katagvigigaat.

⁷ Naamaruamik nalupqisuutairrutiqaqtuŋa, God-auruatiin; Atuġniaqtuŋa nanġaġutin!

⁸ Iqiiġiñ, iḷitqusiiŋ! Iqiiġitchik, harp-lu lyre-lu! Iqiiġñaġiagniaqtuŋa qaummaġiksiŋaiñŋaan.

⁹ Quyanaaġniaġikpiñ, Ataniiq, akunġanni nunaqpaich. Nanġaġniaġikpiñ akunġanni iñuich.

¹⁰ Nuŋulaitchuam nakuaqqurvich tikiñŋagaich qiḷaich; iḷumutuuġutikpiñ aksiŋagaat siḷa.

¹¹ Tautuktirruŋ kamanaqtilaan siḷami, God-auruatiin, nunapayaamiḷu.