Psalms 56 - Iñupiatun Mumiksat Uqalugiksuat

Aŋaiyyun Ukpiqsraqtuamiñ God-mun

Atuqtit aullarriŋannun. Atuunmun “Tiŋmiaq uŋasiksuami Oak-gich napaaqtuŋiññi.” Psalm aglaaŋa David-gum, Philistia-ġmiut pisaġianigmarruŋ David Gath-mi.

¹ Nagligiŋŋa, Ilvich God, uvvaataŋ piyuumigipiaġataġaanŋa; akiḷḷiima nagliksaaqtitkaanŋa ataramik.

² Uvluqtutilaaŋatun akiḷḷiġma piyuumigigaanŋa. Iñugiapiaġataqtut paaqłaŋaritka.

³ Iqsitchakkama, Kamanaqtuatiin Ataniiq, ukpiġutiqaqtuŋa Ilignun.

⁴ Ukpiġigiga God aasii iqsiñiaŋitchuŋa; Nanġaġiga, Ilaan unniqsuqłiutiŋich pisigivlugich. Iñugruiññam suyumiñaqpaŋa?

⁵ Akiḷḷiġma iluiḷḷiuġutiksritchuugaanŋa uvlupaiqł̣ugu; sivunniuqtuaġaqtut anniġumavluŋa!

⁶ Katittaqtut iriqtuqłutiŋ supayaatigun naipiqtuqłuŋa, tuqutchumavluŋa.

⁷ Tatavsakkich, God, pigiiḷḷiqutiŋisigun; akiiḷikkich tamatkua iñuich ilvich qinnautikkun!

⁸ Iḷisimagigma qanutun iluiḷḷiuqtilaamnik; nalunaiqsimagitin agliurruqługich qulvitka. Agliusimaŋitpat makpiġaaġni?

⁹ Uvlumi ququulagupkiñ, akiḷḷiitka qapiġniaqtut. Taamna iḷisimagiga qanukkii God tunulliḷiqsimaaġaaŋa;

¹⁰ God-auruam, unniqsuqłiutiŋich nanġaaġiratka. Atanġuruam, unniqsuqłiutiŋich nanġaaġiratka.

¹¹ Ilaanun ukpiqtuŋa, tainnamik iqsiñiaŋitchuŋa. Iñugruiññam suyumiñaqpaŋa?

¹² God-auruatiin, aitchuiñiaqtuŋa unniqsuqłiutimnik; aitchuiḷuŋa quyyatikun aitchuutinik,

¹³ atakkii annautiŋagiŋma tuqqunmiñ akimapkaqłuŋalu. Pisuaqtuŋaasii takkuani God-im, qaummaġiksuaŋani iñuggutim.