Psalms 53 - Iñupiatun Mumiksat Uqalugiksuat

Iñuum Piḷuktuaguniŋa

Atuqtit aullarriŋannun. Mahalath-kuaqługu. Poem aglaaŋa David-gum.

¹ Isumalluaġiitchuat inmigni uqallagaqtut, “God-aitchuq imña.” Iluqaġmiŋ piaġiitchuagurut, savaguummiut naġġunapiaġataqtuanik suraġautchiñik; atausiq unnii iluaqtualiqiŋaitchuq.

² God-im qiñiqtuaġaġigaich iñuich anmun qiḷagmiñ tautukkumavluni imma kiña isumattutiqaqtilaaŋanik, kiñalu inmiñun aŋaiyyuuqtilaaŋanik.

³ Aglaan iluqaġmiŋ asivaġuurut; ativlutiŋ iluqatiŋ piḷuktuagurut. Atausiq unnii iluaqtuamik savayuitchuq, atausiuraq unnii.

⁴ “Naluvat makua?” God apiqsriruq. “Tamarra makua pigiiḷḷiqirit, tainnatun nalutigivat? Iñuusuurut tigligaiyugaqtuaqługich iñutka, suli aŋaiyyusuiñmiut uvamnun.”

⁵ Tikiññiaġaat aglaan imma iqsittualaviksraqtiŋ qaŋaunnii sivuani uuktuaŋaisaqtiŋ, atakkii God-im siaminniaġai sauniŋich akiḷḷiqsruqtuat ilaata iñuŋiññik. Kanŋunaqsiḷiŋagisikii, God-imkii ayyaktuŋagai.

⁶ Aŋaayyuuqtuŋa Israel-miut akimmatiqaquvlugich Zion-miñ, God-im inaaniñ. Quviatchapalukkisirut iñuŋich Israel God-im utiqtitpauŋ piḷḷuatautaat!