Psalms 52 - Iñupiatun Mumiksat Uqalugiksuat

God-im Isivġiutaa Nagliktuutaalu

Atuqtit aullarriŋannun. Poem aglaaŋa David-gum. Doeg Edomite-guruaq ullautianigman Saul-mun suli kilikługu: “David igluanuŋaruq Ahimelek-gum.”

¹ Summan uqavigaaqpich pigiirrutignik, kamanaqtuatiin? Uvvauna God-gum iḷumun ittuaguniŋa taimuŋa inmiuq.

² Sivunniuġaqtutin uvva allat suksraunġiutiksraŋiññik; qanġiñ uvva ittuq ipiktuatun saviḷḷuuratun. Sagluusuŋaiññaġuurutin.

³ Piḷuktuaġlu iḷumun inŋitchuaġlu nakuaġiłhaaġikkiñ nakuuruamiḷḷu iḷumun ittuamiḷḷu.

⁴ Iñuich anniallatugitin uqalugnik, sagluturualuuk!

⁵ God-guptauq suksraunġiġñiaġaatin isuitchuamun; tigułłagutin piiqsauniaqtutin aimaaġvigniñ; piiqsauniaqtutin nunaŋanniñ iñuuruat.

⁶ Iḷumuuqtuat tautukkumirruŋ taamna iqsitchagniaqtut; iglautiginiaġaatin aasii uqallagmiḷutiŋ,

⁷ “Tautuksiuŋ, unauvva ukpiqsrautaitchuaq God-mun munaqsruutiksrakkaluamiñun, ukpiqsraqsiññaqłuniaglaan umialgutisalagmiñun, qaunaksrigiyumavlugulu ilaan pigiitchuaguniñi.”

⁸ Uvaŋaaglaan arriqaqtuŋa olive napaaqtuatun nauruatun igluani God-im; Ukpiġipiallakkiga ilaata isuiḷaaq nakuaqqutaa isuitchuamun taimuŋa.

⁹ Quyanaaŋaiġumiñaitkikpiñ God savaaġnik; takkuani iñukpich uqausiġiniaġiga ilvich nakuuruaguniġiñ.