Psalms 51 - Iñupiatun Mumiksat Uqalugiksuat

Aŋaiyyun Suliqutigiŋaiquvluni

Atuqtit aullarriŋannun. Psalm aglaaŋa David-gum, uqautianigmani God-im Uqaqtaata Nathan-gum allatuqatiqaqtilaaŋanik Bathsheba-mik.

¹ Naglikkutiqaġiñ uvamnun, ilvich God-auruatiin, pisigivlugu nuŋulaitchuaq nakuaqqutin. Pisigilugulu kamanaqtuaq naglikkutiqpaiñ piikkich piḷuutitka!

² Iqaġilugu pigiiḷḷiqutipayaaġa salummaŋŋa piḷuutimniñ!

³ Puttuqsriruŋa patchisipayaamnik; iñiqługu nayuġaanŋa piḷuusiqutigma.

⁴ Piḷuksiŋaruŋa paaqłakłutin—kisivich paaqłakłutin— suraġaqłuŋa ilvich pigiitchuaġiraġnik. Tavraasii ilvich iluakkuaqtutin isivġiqsruqamŋa; ilvich nalaunŋaruagurutin tatavsautikun isivġiqamŋa.

⁵ Pigiiḷḷiqun uvamniinniqsuq aniñimniñ-qaŋa; siŋaiyaagunimniñ-qaŋa piḷuutiqaqsimaruŋa.

⁶ Piŋŋuaġutairrun iḷumutuuġniġlu iñuggutigitqumagikkiñ; immiġuŋ isummatiga isumattutigiraġnik.

⁷ Piiġḷugu piḷuutiga, salummaqtauyumauŋa; iqaġiŋŋa, qatiqsił̣haaġumauŋa apunmiñ unnii.

⁸ Tusaalaŋa quviatalaruanik; aasii suksraunġiġaluaġumŋa navipiallaglugu irrusiġa, quviatchavsaaqtinniaġiŋma nalupqinaitchuamik.

⁹ Qiñiŋaikkich piḷuutitka suli salummakkich iluqaisa pigiiḷḷiqutipayaatka.

¹⁰ Savagiñ salumaruamik uummanmik uvamni, God-iiŋ, aasii nutaqsaġlugu iḷumutuuqtuamik iḷitqusiġa.

¹¹ Piiqsinniaġnaŋa takkuġniñ; Iḷitqusiġiksuallu piiġñiaġnagu uvamniñ.

¹² Qaitqiguŋ uvamnun quvianaqtuan qaisuuruaq annautikkun, suli kamaksriyumalaaliqsilluŋa ilignun.

¹³ Taimmaliasii uvaŋa iḷisaurriyumauŋa piḷuusiqirinun piraksriutikkun, aasiiḷi iliŋisa utiġvigilutin.

¹⁴ Annautiŋŋa God-iiŋ iñuaŋanimniñ, annaksaġviuruatiin, aasii uvaŋali quviasugluŋa iḷisimapkaġumagiga nalaunŋatilaan.

¹⁵ Ikayuŋŋa uqallallasiḷuŋa Ataniiq, aasii nanġaġniaġikpiḷḷi.

¹⁶ Ilvich aitchuutinik piqaġuŋitchutin, qaiññiaġaluaġitkali; iviġaummatigiŋitkitin ikipkautikkaluat.

¹⁷ God-im iviġaumagigaa aitchuun, atchiksuaq iḷitqusiq; ilvich ayyagniaŋiññiġiñ atchiksuaq isumalitqiksuaġlu.

¹⁸ Ilvich God, naglikkutiqaġiñ Zion-mun suli ikayuġlugu; nappatqigḷich katchiŋich Jerusalem-gum.

¹⁹ Tavraasiiñ iviġaummatigiḷḷasiyumagitin nalaunŋaruat aitchuutit, iviġaummagivlugiḷḷu ikipkaŋaruat aitchuutit; aŋusalluniglu aitchuiḷḷasiyumaugut ikipkaivigñi.