Psalms 50 - Iñupiatun Mumiksat Uqalugiksuat

Iḷumun Nanġaiñiq

Psalm aglaaŋa Asaph-gum.

¹ Sapiġñaqtuaq God, Ataniq, uqaqtuq; ququularuq iñupayauranun sumiḷiqaa.

² God qivliatittuq Zion-miñ, iniqpagmiñ naamaruamiñ qiñiyunaġniġmiñi.

³ God qaiñiaqtuq aglaan siaksruisaaġniaŋitchuq; nutqaqtinnaiḷam igniġum sivulliuġaa, siḷaqłuum avatkaa.

⁴ Ququulagaik qiḷaglu nunalu iḷisimarigisukługik qiñiquvluni isivġiigumi iñugmiñik.

⁵ Uqallaktuq, “Atautchimuksigich iñutka uvamnun ukpiqtuat, tamatkua sivunniuqatigiŋaraanni aitchuivḷutiŋ ikipkaikamiŋ.”

⁶ Qiḷaich unnii nalunaiqsruġaat God iluaqtuagutilaaŋa, ilaakii God isivġiirauruq.

⁷ “Naalaksiñŋa, iñumaaŋ, uvva uqaaqsiruŋa; Uqausiġiniaġikpiñ paaqłaglutin, Israel-guruasii. God-auruŋa, God-iksi ilivsi.

⁸ Siḷġiqsuyuitkikpiñ pisigilugich aitchuutitin ikipkautitillu ataramik qaitchuuratin.

⁹ Suli pigiraksraġiŋiñmigitka aŋusallut pamiqsaaqaġvigniñ naakka nagrulgich imnait pamiqsaagutigniñ;

¹⁰ iluqaisakii niġrutit uvaŋa pitka napaaqtuġmiutat pamiqsaallu qimiġaasalagniittuat.

¹¹ Iluqaisalu tiŋmiat pamiqsaaguŋitchuat pigigitka iñuuruapayaallu nunaraaniittuat.

¹² “Uvva kaakkuma, uqallautigayaitkikpiñ kaagniḷuŋa, atakkiuvva nuna supayaallu nunamiittuat tamarra pitka.

¹³ Niġisuuvik niqipiaŋiññik aŋusallut naakka imiġuuvik auŋiññik imnaich nagrulgich?

¹⁴ Quyyanmik God-mun aitchuiḷutin; suli taŋŋiġḷugich unniqsuqłiisigiŋaratin Qutchigñiqtauruamun.

¹⁵ Ququulaŋŋa iłuiḷḷiuġun qaikpan; annautiniaġikpiñ, ilviḷḷi nanġaġniaġigma.”

¹⁶ God-liaglaan uqallaktuq piḷuktuanun, “Summan suli taimuŋaaġniaġmivisigiŋ pitquratka? Summallu uqaġiniaqpisigiŋ sivunniutitka?

¹⁷ Ilivsiuvva natqiksruqulaiñmiusi uvamnun; kamagisuitkisi pitquratka.

¹⁸ Iḷauraakkiutisuummiusi tigligayuktipayaanun tautuktavsiññun, piqasiutivlugich allatuqtit.”

¹⁹ “Uqausiġiyumalaaġuugisi pigiitchuat; nutqapilaitchusiunnii sagluyumaalliqavsi.

²⁰ Pasiuqsayagisi iḷasi nanmiñiq pasiraksraqsiuqłusi.

²¹ Tainna tavra pisuugaluaqtusi uqallayuitchuŋa, isumasuurusi ilivsitun innasugivluŋali. Akkupak aglaan suakkivsi salapqiqsaqługich piḷuutisi.”

²² “Naalaġnisiuŋ una, ilivsi suuŋiḷaqsriruasii uvamnik, suksraunġiqpiaġivsi, iñuksraitchuq annaurriksravsiññik.

²³ Qaitchiñiq quyyanmik aitchuutaumman tavra taaptuma qutchiksiḷiġaaŋa, aasii iḷumutupiallak annautiniaġitka kamaksripayaaqtuat uvamnik.”