Psalms 49 - Iñupiatun Mumiksat Uqalugiksuat

Isumalluaġiirrutaa Ukpiqsraqtuam Umiallagniġmun

Atuqtit aullarriŋannun. Psalm aglaaŋat iḷaŋisa Korah-m.

¹ Una tusaasiuŋ, iluqasi! Atta, iñuich sumipayaaq ittuasii,

² kamanaqtuaġlu kamanaitchuaġlu atiruk, umialikpaglu iḷiappauruaġlu atiruk.

³ Isummatitka nalunaiññiaqtut; Uqaġniaqtuŋa isumattunmik.

⁴ Qiviaġviginiaġitka isumaturuat uqalugaaŋich aasii kaŋiqsipkaġniagaqsiḷugu sivuniŋa atuqtuurallaġma nuqaqtiligmik.

⁵ Iqsisaitchuŋa navianniuġnaġaluaġman avalluġaanŋaunnii akiḷḷiima,

⁶ Iñuich ukpiqsraqtuat umialguniġmignun kamasaaqłutiŋ qanutun umialgutilaamignik.

⁷ Uvagut uvaptignik tasuġumiñaitchugut; akiḷiiganikkumiñaitchugullu God-mun nalliġḷugu akisutilaaŋatun iñuggutipta,

⁸ atakkii akiksraŋa iñuum iñuggutaata akisuvaitchuq. Akiḷiiḷḷaluta akiḷiisaġaluaġupta naamayumiñaitchut

⁹ tikiutiŋiḷḷuqtugut unnii iḷuviqtauviksraptignun, iñuullaluta taimuŋa isuitchuamun.

¹⁰ Kiñapayaaq iḷitchuġiŋaruq isumaturuat unnii tuqullatilaaŋannik, Isumalluaġiitchuat naakkaqaa isumatuitchuaq. Iluqaġmiŋ umialgutitiŋ uniḷḷagaich iḷamignun.

¹¹ Iḷuvvivisiŋ taimma aimmaviḷiutivlugich isuitchuamun; nayuqsaġataġaat taimuŋa, imma qaŋauvlugu inmikkun nunaqaŋagaluaqtuat.

¹² Kamanaqsiñipta tuqutchaiḷiyumiñaitkaatigut; tuquyumaaqtugut niġrutitun.

¹³ Tautuksigich inmignun nalupqisuŋirviqaqtuat, nalaunniakkaŋaat susuŋisaaġviqaqłutiŋ umialgunmignik—

¹⁴ sivuniġiitchut tuquruksrauvlutiktauq imnaisun, Tuqqun imnaiḷiqiriginiaġaat. Iluaġniaqtuat akimmasiqsaukpata atanniqsimaaġlugich, timiŋich qilamik auniaqtut nunaanni tuquŋaruat uŋasigḷutiŋ aimmavigmigniñ.

¹⁵ Aglaalli God-im annautiniaġaaŋa; annautiluŋa suaŋŋataaniñ tuqqutim.

¹⁶ Isumaqługnak iñuk kisupayaaq umiallagniqpan, umiallavsaasugruktuq unnii;

¹⁷ tigumiaġniaŋitkaiptaukkii tuqugaluaġumi; umialgutaisa malikkumiñainmigaat iḷuvvivianun.

¹⁸ Pagmapak unnii iñuusiqtiŋ quviagiluġaat aasii suli nanġaqsiqł̣uni piḷḷuataġuuvaił̣ł̣uni,

¹⁹ iḷḷatiniaġmiuġli iḷamiñun tuquluni, taaqtuaqtuamun taimuŋa isuitchuamun.

²⁰ Qutchiksiñipta tuqutchaiḷiyumiñaitkaatigut; tuquniaqsimammiuguttauq niġrutitun.