Psalms 48 - Iñupiatun Mumiksat Uqalugiksuat

Zion, Iniqpaŋa God-im

Psalm aglaaŋat iḷaŋisa Korah-m; atuun.

¹ Ataniq kamanaqtuq aasii qutchiksuaġilugu nanġaaksrauruq iniqpaŋani God-ipta, Ilaan salumaruami iġġiŋani.

² Zion, iġġiutaa God-im, qutchiksuq qiñiyunaqtuġlu; iniqpaŋata kamanaqtuam umialgum quviatchaigaa nunapayauraq.

³ God iḷitchuġipkaiŋaruq navianaisilaaŋa ilimiñiittuni isiġmiuvluni uqqisimaaġviŋiññi iniqpaum.

⁴ Umialgich katinŋarut aasii aullaqivlutik Zion tuŋaanun.

⁵ Tavraaglaan tautukkamirruŋ, aliuġutchaktut; iqsitchakhutiŋ qimaasiññaqtut.

⁶ Uuliksiqpaŋarut unnii, aġnaq aulayyautiraatun iġñiaqsivḷuni.

⁷ Umiaqpaktun qaiḷḷiqpaum siqumittaatun.

⁸ Tusaaraġigivut God-im savaaŋich, pagmapak aasiuvva qiñiġikput iniqpaŋani God-ipta. Atanġum Sapiġñaqtuam; ilaan navianniuqtitaupkaġumiñaitkaa iniqpak taimuŋa isuitchuamun.

⁹ Iḷuani Aŋaiyyuvikpakpich, Ilvich God, isummatigiraġigikput nuŋulaitchuaq nakuaqqutin.

¹⁰ Nanġaġuugaatin iñupayaat sumiḷiqaa, surġausiḷḷuatan aasii naluŋaiŋagaat nunapayaurami. Atanniqsuiraqtutin pitqiksiġautaitchuakkun;

¹¹ iñuŋi aasii Zion quviasuglich! Ilvich iluatun isivġiisuurutin; quviasuglich iniqpaŋiññi Judah-m!

¹² Iñugiraasii God-im, kiavallaksiuŋ Zion aasii kisisaaġlugich nasisaaġviuruat;

¹³ naipiqtuqsigich katchiŋi qimilġuuġlugiḷḷu uqqisimaaġviŋi; uqautillayumagitin taipkua kiŋuvaaguniaqtuat:

¹⁴ “Taamnauvva God, God-igigikput taimuŋa isuitchuamun; Ilaan sivulliuqsaġataġaatigut isuksraitchuamik.”