Psalms 46 - Iñupiatun Mumiksat Uqalugiksuat

God Nayuġaatigut

Atuqtit aullarriŋannun. Atuutiliaŋat iḷaŋisa Korah-m. Alamoth-kuaqługu. Atuun.

¹ God uvva uqqisimaaġvigigikput suaŋŋatigivlugulu, itqanaitchuq ataramik ikayuġumavluta iluiḷḷiuġutiptigni.

² Tainnamik iqsiñiaŋitchugut, nuna aulayyakkaluaqpan iġġiḷḷu katagaaġaluaqpata taġiumum.

³ Ulivragaqtaqtuatun taġiutun qasaqtaqtuatullu qaiḷḷiqtun, iġġiḷḷu aulayyaktaulutiŋ qasaqtaqpaiḷḷuni.

⁴ Kuuk ittuq quviasuusiqsiruaq iniqpaŋanun God-im, salumaruamullu igluanun Qutchigñiqsrauruam.

⁵ God nayuutiruq taaptumani iniqpagmi, suksraunġiqsauyumiñaitchuami; qausaġataqpan aggiġñiaqtuq anniqsuġiaġlugu.

⁶ Nunaqpaich tatamaaliqsut, umialgutillu aulayyaktut; God nivliġman kalluktun, nuna nuŋuruq aukługu.

⁷ Atanġum Sapiġñaġniqsrauruam nayuġaatigut; God-iŋa Jacob-gum uqqisimaaġvigigikput.

⁸ Qaiḷusi tautugiaqsiuŋ Atanġum savaaġikkaŋaa. Qiñiqsiuŋ qanutun kamanaqtuanik savaŋatilaaŋa nunami.

⁹ Nutqaqtitkai aŋuyaktuapayaat siaminŋaruat sulliñipayaaŋani nunam; navgiruq pisiksiñik, suksraunġiivḷuniḷu pananik, akkiaġautit unnii ikuallaktitkai.

¹⁰ “Nutqaġitchi,” Ilaa uqallaktuq, “iḷisimalusi God-autilaamnik, qutchiłhaaqtuaq nunaqpaupayaaqtuaniñ, atanniqsimaaqługulu nuna.”

¹¹ Atanġum Sapiġñaġniqsrauruam nayuġaatigut; God-iŋa Jacob-gum uqqisimaaġvigigikput.