Psalms 45 - Iñupiatun Mumiksat Uqalugiksuat

Atuun Umialik Katitinman

Atuqtit aullarriŋannun. Atuunmun “Lilies-tigun.” Poem aglaaŋat iḷaŋisa Korah-m. Tuvaaqasiġnikun atuun.

¹ Piqpagnaqtuat uqaluich siḷivitkaat isumaga, atuusiuġutillaan uumiŋa umialik. Aglausiatun aglayuqtuam uqaluksranigaqtuŋa aglaaksramnik.

² Aŋutigigñiqsraurutin uvva aŋutiniñ; uqayuġmiutin. God-im ataramik piḷḷuatautiqaqtitchuugaatin,

³ Tavsiġmiuttuuŋ savikpaiñ, suaŋaruatiin umialiik; Qaumaniliktun ittutin suli kamanautiqaqtutin.

⁴ Kakaksiġiñ qutchiksiḷutin akimayyaġutin akimmatisaġlugu iḷumun ittuaq pitqiksiġautairrullu. Suaŋaniqpich akimmasiqsuaġisigaatin!

⁵ Qaġrutin ataŋ ipikhutiŋ, uummatchiraġigaich umialgum akiḷḷiŋich; nunaqpaich aasii isigagnun ulġuvlutiŋ.

⁶ Umialgun God-im qaisaŋa ilignun; itchaġataqtuq taimuŋa isuitchuamun. Atanniqsuivḷutin iñugnik pitqiksiġautaitchuakun;

⁷ nakuaqsrirutin iluaqtuamik aasi uumigivlugu piḷuktuaq. Tainnaqhuni God-im, ilvich God-ikpich, piksraqtaaġiŋagaatin suli quviasuutiksrił̣haaqłutin allaniñ unnii umialguruaniñ.

⁸ Myrrh-nik aloes-nik cassia-niglu tivraġiksaŋarut annuġaatin; atuqtuuraqtit naalaktuannaraaqtitkaatin umialgich igluŋiññi qiñiyunaqsaŋarani tuugaaniñ.

⁹ Akunġanni aġnat aniiqsuaġviata tamarraptauq paniutiŋich umialgich, aasii taliqpiani aquppiutaqpich makitaruq umialgum aġnaat, atuqługich qiñiyunaqusiat kaviqsuamik manigmik.

¹⁰ Nuliaksrautauruatiin umialigmun, naalakkich uqalutka— iñutin puigukkich nanmiñikkaluatin unnii.

¹¹ Aġnaġikł̣utin umialgum pigiliutisukpagniaġaatin; ilaa ataniġigiñ, kamagiraksraġigiñ.

¹² Iñuŋisa Tyre-m aatchiñiaġaatin aitchuutimignik; umialguruallu iviġaumagipkaġniatagniaqtut ilignun.

¹³ Umialgum paniŋa igluqpaŋaniittuaq aġnaġikpaktuq! Qaliġuuraŋa miquŋagaat kaviqsuamiñ manigmiñ ivaluliamik.

¹⁴ Qiñiyunaqtuamik qalġuuraqtuqłuni umialigmuutigaat, aquliraqługu niviaqsiaqatiŋisa.

¹⁵ Ikiaqtalaaqhutiŋ quviasualallaġmiŋ aggiqsut isaarut umialgum igluqpaŋanun.

¹⁶ Ilvich, uvva umialiik, iġñiġukkaqsiñiaqtutin kiŋuvaatin umialiguqtaulutiŋ, ilvich aasii atanniqsuiriġuqtillugiḷḷi nunapayaamun.

¹⁷ Atuusiaġma puiguumapkaġniaŋitkaa piḷġusiñ taimuŋa isuitchuamun, taimmaasii kisupayaam nanġaqsaġataġlutin taimuŋa isuitchuamun.