Psalms 44 - Iñupiatun Mumiksat Uqalugiksuat

Aŋaiyyun Munaġitquvluni

Atuqtit aullarriŋannun. Poem aglaaŋat iḷaŋisa Korah-m.

¹ Uvagut siutillaaptignik tusaaŋagikput, God maŋŋuuptaptauq quliaqtuaġutiŋammigaatigut, quliaqtuaqhutiŋ kamanaqtuanik savaaġiraġnik takkuanni, aippaani uvluŋiññi;

² qanuq ilignun anitilaaŋannik ukpiŋaitchuat inillaktiłługich aasii ilvich iñutin nunaŋannun; qanuġlu tatavsaikavich allanik nunaqpauruanik aasii iñuktin piḷḷuataqtiłługich.

³ Iñutin nunannaŋaitchut savikpamignik; akimaŋaiñmiut suaŋŋanmikkun; aglaan ilvich suaŋŋatikkun, nalupqigiŋił̣ł̣ugulu nayuutitilaan, qiñiqtinnapku nakuaqqutin ilaiññun.

⁴ Ilvich umialigigikpiñ God-igivlutillu; akimapkaqsimaaġitin iñuktin,

⁵ aasii ilvich suaŋŋatikkun akiiḷisuugivut akiḷḷivut.

⁶ Ukpiqsrautaitchuŋa pisiksimñun naakka savikpamnun annautiniaġasugiluŋa;

⁷ ilvich aglaan annautisuugivsigut akiḷḷiptigniñ akiisitaqługiḷḷu uumigirivut.

⁸ Nanġaqsaġataġivsigiñ Quyanaaqtuaġutillu taimuŋa isuitchuamun.

⁹ Pagmapak aglaan uvva ayyakkivsigut akiisiłłutaasii; avluġaaqasiŋaiġitin uvva aŋuyaktivut.

¹⁰ Qimaktiłłutaasii akiḷḷiptigniñ, iliŋisaasii piññaktaaġivlugich piutivut.

¹¹ Imnaisun aasii tuqutaupkaqłuta; siamitiłłuta allanun nunanun.

¹² Tunigitin ilvich iñuuraġniatin akiisuuraqługich naggutaiḷaaqługich.

¹³ Siḷalliipta qiñiġaat qanuq ilignun aŋalatilaaqput, kipagiaqsivḷutaasii iglaquvsisigivlutalu.

¹⁴ Iglaquvsautiġuqtitkivsigut uvva akunġanni nunaqpaich; niaqullatigivlutalu kipakkunmigni.

¹⁵ Qiñiġviiḷḷakamauvva; Matugaaŋa kanŋusuutim

¹⁶ naalaġnivaił̣ł̣ugich kipakłiqsit pisaaŋaruallu akiḷḷitka uumiksriruallu uvamnik.

¹⁷ Iluqatiŋ tamarra piut uvaptignun, puiguiŋaitkaluaqtiłłuta ilignik naakka navgiŋaitkaluaqtiłłuta sivunniuġutiptignik.

¹⁸ Tuniqsimmataiŋaitchugut suli ilignun; kamaksriŋisaaġuta piŋiñmiugut piraksriutignik.

¹⁹ Iginŋagivsigut niġrułługnun susallaiqł̣uta; qimakhuta taaġniqsramun.

²⁰ Nanġaiŋaiġñiġupta piiguġlugu God-ikput aŋaiyyuuġutalu allat godiŋiññun,

²¹ iḷumutupiaq iḷitchuġiniaġaluaqtusi, atakkii iḷisimagitin isumavut suiḷaurrisit unnii.

²² Aglaan ilvich pisigivlutin uvagut tuqutaugaluamiiqtugut, aŋalatchiqhuta imnaisun tuqutaksrauruatun.

²³ Itiġiñ, Ataniiq! Summan imña siñikpich? Iqiiġutin, ayyaktuŋaiqsigut isuiḷaamik!

²⁴ Summan iriqsimavich? Puiguġnagu kiiqsiuġniqput isumaaluutikpullu!

²⁵ Ulġurugut naqirvaktatun nunamun; nalavluta akiisitatun nunami.

²⁶ Makillutin ikayuqsigut! Pisigilugu nakuaqqutin nuŋulaitchuaq annautisigut!