Psalms 42 - Iñupiatun Mumiksat Uqalugiksuat

Tugliŋat Makpiġaat Psalms-mi ( Psalms 42—72 ) Aŋaiyyutaa Aullaqtitauŋaruam

Atuqtit aullarriŋannun. Poem aglaaŋat iḷaŋisa Korah-m.

¹ Tuttu inuġruliġmatun maqsraluktuamiñ niglaumaaqtuamik imiġmik, tainnaptauq inuġilipiallagmigikpiñ, God-auruatiin

² God-iiŋ iḷitqusiġa inuġruliqsuq ilignun iñuuruamun. Qakuguimña nanġaiyyaġniaġniqpik sivuġaġnun?

³ Uvlumi unnuamiḷu qiaraqtuŋa, qulvitkauvva niqigitualuliutigitka; akiḷḷiima apiqsruġaluamiiġaanŋa, “Nauŋ imña God-in?”

⁴ Uummatiga navigaqtuq itqaikama qaaŋianiŋaruanik, iñugiakhuta igluanuaqsiraġikapta God-auruam igliġutivlugich pisukataqtuat, quviatalaruat, atullaġmiŋ nipatuvlutiŋ nanġaqługu God.

⁵ Summan ipiqtusukpik? Summallu isumaaluktuaqpik? Niġiukkutiga iḷiñiaġiga God-mun, kiikaa suliasii nanġavsaagaqsiḷgiḷḷugu ilaa, annaurrigiraġa God-igalu.

^6-7 Aullaqtitauŋallaġma maani uummatiga isumaaqtuq, tainnamik isummatiqarraqsiruŋa ilaanik. Ilaan isumaaluutiksritkaaŋa iŋiuligruat maturuatun iḷitqusiġa; tuavaallatim nivliallatigaaŋa uliqpaktuatun, arriqaqhutiŋ anmun suvliktuatun imaq Jordan-mun Mount Hermon-miñ Mount Mizar-miḷḷu.

⁸ Atanġuptuq maniuġliuŋ nuŋulaiḷaaq nakuaqqunni uvluuŋŋaan, atuutiqallasiyumauŋa unnuami, aŋaiyyuluŋalu God-iŋanun iñuggutigma.

⁹ God-mun, annaksaġvimñun, uqallaktuŋa, “Summan puiguqpiŋa? Summallu nagliksaaqtuaġniaqpik piuġrugitchiqsuaġisivik akiḷḷiimniñ?”

¹⁰ Nagliksaaqtitkaanŋa pisaaŋŋataisa, apiqsruŋaiyuiñmigaanŋa, “Nauŋ immaimña God-in?”

¹¹ Summan ipiqtusukpik? Isumaaluktuaqpiglu? Niġiukkutiga tutinniaġiga God-mun, Ilaa aasii nanġavsaagaqsiḷgiḷḷugu, annaurriga God-igalu.