Psalms 41 - Iñupiatun Mumiksat Uqalugiksuat

Aŋaiyyutaa Naŋittuam

Atuqtit aullarriŋannun. Psalm aglaaŋa David-gum.

¹ Quviasuglich isumaaluutiqaqtuat piiḷḷiuqtuanik; Atanġum ikayuġniaġai siġġaqiliqpata.

² Atanġum munaġiniaġai annautilugiḷḷu iñuggutiŋi; piḷḷuatautiqaqtinniaġai nunami; iginniaŋitkaich suaŋŋataannun akiḷḷiŋisa.

³ Atanġum ikayuġniaġaich naŋiliqpata suli mamitinniaġaich.

⁴ Uqallaktuŋa, “Piḷuusiqiŋaruŋa paaqłakłutin, Ataniiq; nagligiluŋa iluaqsiŋŋa.”

⁵ Akiḷḷiġma uqautigimaqłukkaanŋa. Tuqutqugaanŋa aasii puiguġluŋa.

⁶ Tautugiaġaluaqtigma tautugumapiaŋiḷḷaġma piut; uqaqtut piaġiitchumiñaqtuanik uvapkun aasii anikamiŋ kimulliqaa uqaġiaqsivḷugu.

⁷ Uumiksripayaaqtuam isivruutigiraġigaanŋa, isumamigni piḷugniqsraġuqłuŋa.

⁸ Uqaqhutiŋ, “Iluaqsiyumiñaitchuamik naŋittuq; makitqikkumiñaitchuq tuttaamiñiñ.”

⁹ Avilaitqatipiaġataġma, ukpiġipiallaktaġma, aviktuaqatigma niqinik, akiḷḷiḷiqsuliġaaŋa.

¹⁰ Nagligiŋŋa, Ataniiq, aasii iluaqsiḷuŋa, utiqtitchivigiyumagitkali akiḷḷiitka.

¹¹ Akimmatiqaġniaŋitchut uvamniñ, aasii iḷitchuġiniaqtuŋa Ilignun ivigaumagitilaamnik.

¹² Ikayuġniaġigma, uvvakii iluaqtualiqisuuruŋa; takkuġni itinniaġigma taimuŋa isuitchuamun.

¹³ Nanġaqsiuŋ Ataniq, God-iŋa Israel-gum! Nanġaġli pagmapak taimuŋalu isuitchuamun! Aamian! Tavrapiaġataq!