Psalms 40 - Iñupiatun Mumiksat Uqalugiksuat

Nanġaun Atuun

Atuqtit aullarriŋannun. Psalm aglaaŋa David-gum.

¹ Qiñuiqł̣uŋa utaqqiuqtuŋa Ataniġmiñ ikayuusiaksramnik; saatkaaŋa aasii qirratiga tusaavlugu.

² Nuqitkaaŋa navianaqtuamiñ iḷuqsramiñ, amuvluŋa muġrugnaqtuamiñ qaviamiñ tuqqutausuuruamiñ Ilaan iḷigaaŋa navianaitchuamun uyaġagmun anayanniuŋaiqł̣uŋa aasii.

³ Iḷisautigaaŋa atullasivḷuŋa atuutitchauramik, nanġaunmik atuunmik God-iptignun. Iñugiaktuat taaptumiŋa tautuktuat qiksiksraliġñiaqtut, aasii ukpiqsraliġutiŋ Ataniġmun.

⁴ Quviasuglich ukpiqsraqtuat Ataniġmik, saanŋitchuat arguaŋŋanmun. Naakka saanŋitchuat iñuuraqpagnun.

⁵ Ilvich iñugiaktuanik savaŋarutin, Ataniq God-iiŋ; piitchuq iliktun ittuamik! Ilvich iñugiaktuanik sivunniuġutiŋagiptigut aliuġnaqtuanik Uqausiġianikkumiñaitkitka tamatkiġḷugich— iñugiakpaitchut kisitchaġaluaqtuni!

⁶ Ilvich piqaġuŋitchutin ikipkautinik aitchuutiniglu; apiqsriŋiñmiutin niġrutinik aulaiḷḷugich ikipkaqulugich ikipkaivigmi ikipkautikullu piḷuutaiqsitquluta Aglaan, siutiliŋagigma tusaatquvlutin,

⁷ aasii kiugikpiñ, “Uvaniittuŋauvva; piraksriqsuutitin uvamnun ittut makpiġaaŋiññi pitquraqpich.

⁸ Nalautchaallatugiga pisuutin, God-iiŋ! Uummanmiutaġigitka pitquratin.”

⁹ Katirvianni iñugirapayaaqpich, Ataniiq, Uqaġigitka tusaayugaalluatat Ilignun annautinivḷuta. Iḷisimagiñ uqausiġiŋaiġumiñaitchaġa.

¹⁰ Kisimġuqtaaŋiñmigiga tusaayugaalluataŋa annautim; Uqausiġiŋaiyuitkiga ukpiġnaqtilaan ikayuutillu. Atautchimugmata iluqatiŋ iñugiratin nipaisimaaġutigisuitkitka ukpiġnaqtuaġutilaan suli nuŋulaiññiŋa nakuaqqurvich.

¹¹ Ataniiq, iḷisimaruŋa nagligiŋaiġumiñaisilaamnik Ilignun. Nakuaqqurvich iḷumuuġutikpiḷḷu anayanniuqtinniaŋitkaanŋa.

Aŋaiyyun Ikayuquvluni

¹² Avanŋagaanŋauvva isumaaluutisalaich— iñugiakpaitchut kisitchumagaluaqtuni! Piḷuusiqutimnullu aŋupkaqtuŋa, tautullaiqsuŋa; iñugiałhaaqtullu niaqumni ittuaniñ nutchamniñ, nikasulipiallaŋaruŋa.

¹³ Annauttuŋŋa, Ataniiq! Ikayuŋŋa akkupak!

¹⁴ Tuqutchiñialaruattuq uvamnik akiiḷḷich qanuqsausiiqsitaulutiglu. Quviasuktuallu iłuiḷḷiuġnipkun utiġragiaqtitaulich kanŋunaqsiḷiqtaulutiglu.

¹⁵ Kipakłiqsuallu uvamnik nikatchaglich akiiññamiŋ.

¹⁶ Tamatkualu Ilignun ullautipayaaqtuat qaamatchaglutiŋ quviatchaktitaulich. Tamatkualu quyyatiqaqtuat annautiksrirrutignun ataramik uqaġlich, “Qanutun kamanaqtigiva Ataniq!”

¹⁷ Uvaŋakii sayaitchuŋa iḷiappauruŋalu, aglaan puiguŋaitkigma Ataniiq. Ilvich annaurriga God-igalu, qilamik anniqsuġiaŋŋa!