Psalms 39 - Iñupiatun Mumiksat Uqalugiksuat

Quliaqtuutaa Nagliksaaqtuam

Atuqtit aullarriŋannun, Jeduthun-mun. Psalm aglaaŋa David-gum.

¹ Uqallaktuŋa, “Qaunakłaaġniaqtuŋa surġausipkun suli qanimnun piḷuksipkaquŋiḷḷuŋa qaunakłaaġniaqtuŋa; uqaġniaŋitchuŋa piḷuktuat nayuutiŋŋaisa.”

² Nipaisimaaqtuŋa, uqallagnauramik unnii, sunaunnii nakuuluqtuq! Aglaan nagliksautiga iŋattaqsiiññaqtuq,

³ payariñialammigaaŋa uvva uŋiarrisigma. Isumavluŋa tainna, isumaaluliqsiiññaqtuŋa; Kiisaimma apiqsrivik:

⁴ “Ataniiq, qanutun immaimña iñuutiginiaqtuaŋaa? Qakugu tuquniaqpik? Iḷisimapkaŋŋa qakugu isukłiññiaqtilaamnik.”

⁵ Qanutun uvva naisigiruamik iñuuviksriŋamagigma! Qiññaġni sivisutilaaŋa iñuggutigma piuŋiḷatun itkiñ. Iḷumutun iñuggutiqapayaaqtuaq arriqaqtuq aniqsaallaksiññaqtuatun,

⁶ taġġiraaqsiññaqtuatun. Supayaaqtavut suuŋitchut; umiallakkapta, kimun piññaktaaġiniaqtilaaŋannik nalurugut.

⁷ Sumik, imma, niġiugaqaġniaqsimavik, Ataniiq? Niġiukkutiga ilignukkiga.

⁸ Annauttuŋŋa piḷuutipayaamniñ, suli isumalluaġiiḷanun kipagipkaġniaġnaŋa.

⁹ Nivliraġniaŋitchuŋa. Uqallagniaŋitchuŋalu, ilvich kiuvva tainnatchikun nagliksaaqtitkigma.

¹⁰ Tatavsaŋaiġñaqsigigmauvva! Tuquaqsiruŋauvva piyuaqpaił̣ł̣uŋa ilvich.

¹¹ Tatavsaisuurutin piḷuutiptigun suakłuta, qupilġutun suksraunġiġuugitin piviuttaġikkavut supayaaat. Iḷumutun ittugut aniqsaallaksiññaqtuatun!

¹² Tusaagguuŋ aŋaiyyutiga, Ataniiq, naalaglugulu qirratiga; qaiñ ikayuġiaŋŋa qirrugnimni. Taipkunatitun maŋŋuupayauraptun Uvaŋa tuyuġmiaġigigma sivikisuurami.

¹³ Qaunagiŋaiŋŋa suagguuq quviasuliqsuŋa tuquŋaiñŋaġma.