Psalms 38 - Iñupiatun Mumiksat Uqalugiksuat

Aŋaiyyutaa Nagliksaaqtuam

Psalm aglaaŋa David-gum; isumaaġunmi qiaruam.

¹ Araa Ataniiq, tatavsaġnaŋa qinnaŋallaqpich!

² Ikiḷḷiiŋagigmauvva qaġruġnik; ulġuqhaatinŋagigmauvva.

³ Qinnautikamŋauvva, kiiqsiuliqpaŋaruŋa; timiga iluqaan naŋirrutiniktitkaat piḷuusiqiaġma.

⁴ Qanuqsausiiġaanŋauvva piḷuusiqiaġma; uqumaiḷḷiraatka uqumaitpaił̣ł̣utik akigaanignaitchut.

⁵ Tavrakii uvaŋa isumalluaġiiñŋavluŋa, kiḷḷitka marra tippaktut auvlutiŋ.

⁶ Puuŋasikamauvva, siquptaq; Qiñuuqtuaġaqtuŋa uvluqtutilaaŋatun.

⁷ Uunnautinikpaŋaruŋauvva suli tuquaqsiuraqtuŋa.

⁸ Piḷaipiallaktuŋa susallaipiallakłuŋa; uummatiga iluiḷḷiuqtuq, iiqtuaqtuŋa anniġñaqłuŋa.

⁹ Araa Ataniiq, iḷisimarutin sumik inuqsraqtilaamnik; tusaasuugitin iiqtuaġutipayauratka.

¹⁰ Uummatitchiaŋaiḷḷaiqsuŋa, suaŋŋataiġmiuŋa, takpiiḷisaiññaġmiuŋa.

¹¹ Avilaitqanma siḷalliġmaunnii qaninŋallaiġaanŋa, kiḷḷiqsuqpaił̣ł̣uŋa; nanmiñiq iḷamaunnii ullallaiġaanŋa.

¹² Tamatkuaptauq tuqutchisuktuat quviġluŋa pisaġisukłuŋa, anniaqłiġumaruat uvamnik sivuuġasaaġaanŋa maqurrutiksraqsiuqłuŋa; nutqalaitkaich uvapkun sivunniuġutitiŋ akiḷḷiġivluŋa.

¹³ Arriqaqtuŋauvva tusaalaiḷatun, uqallayuitchuatun uqalaił̣ł̣uŋaunnii.

¹⁴ Ittuŋauvva kiggutiqayuitchuatitun, atakkii tusaalaił̣ł̣utiŋ.

¹⁵ Ukpiġigikpiñ aglaan, Ataniiq; Ilvich aasii, kiuniaġigma Ataniiq God-iiŋ.

¹⁶ Akiḷḷiimnun iluiḷḷiuġutiga kipakkutaupkaġnagu; uqavigaaqtinnagiḷḷu killukkuaġutiga pisigilugu!

¹⁷ Ulġuyasiuraqtuŋa suli ataramik kiiqsiuqtuŋa.

¹⁸ Quliaġitka piḷuutitka; nunuurautigigitka piḷuutitka.

¹⁹ Akiḷḷitka marra makua sayyaġigmiut suaŋavlutiglu; iñugiaktut uvamnik uumiksriruat patchisaitkaluaŋŋaġmiŋ.

²⁰ Tamatkua piaġiiḷanik paaqłautiqaqtuat nakuuruanun akiḷḷiqsruġaanŋa iluakkuaġniḷugniġa pisigivlugu.

²¹ Suksraaġnaŋa Ataniiq; qimaummiñaŋa, God-iiŋ!

²² Qaiḷutin qilamik ikayuŋŋa, Ataniiq Annaurriiŋ!