Psalms 37 - Iñupiatun Mumiksat Uqalugiksuat

Tikisaksrautaa Piḷuktuam Nakuuruavlu

Aglaaŋa David-gum.

¹ Uŋiarrisaġinagich piḷuktuat; tusunagiḷḷu killuliqirit.

² Tautugnaiġaqsiuraqtut iviktun panaqłuktatun; tuquniaqtut nauriatun tuquliruatun.

³ Ukpiġisiuŋ Ataniq suli iluaqtualiqilusi; iñuulusi nunami navianniuŋiḷḷusiasii.

⁴ Quviasuutigiuŋ Ataniq, Ilaan aitchuġniaġaatin uummatigni pigiyumakkaġniik.

⁵ Qaiḷḷutin ilignik Ataniġmun; ukpiġigupku, ikayuġniaġaatin;

⁶ Ilaan qaummaġiktinniaġaa iluaqtuaguniġiñ qitiqqaġman siqiññaaġiksuatun.

⁷ Qiñuiġutin utaqqiuŋ Ataniq nalautitchiñiksraŋanun; uŋiarrisaqaġniaġnak piḷḷuataqtuanik naaggaunnii tamatkuniŋa taŋŋiqsiruanik pimaqłuktautinik.

⁸ Qaiññak uŋiarriñmun naakka qinnaunmun; tikiurrisiññaġuuruq iluiḷḷiuġutiksramun.

⁹ Ukpiqsraqtuat Ataniġmun nunannaktaaqaġniaqtut, aglaalli piḷuktuat anitaulutiŋ.

¹⁰ Sivikitchuami piḷuktuat inŋaiġñiaqtut; ivaġniaġaluaġitin, paqitchumiñaitkitin;

¹¹ piuniaŋitchuaq aglaan nunannaktaaqaġniaqtuq aasii quviasuuttaqaġuni piḷḷuataunmik tutqiunmiglu.

¹² Piḷuusiqirit pimaqłuutiksraqsiuġuugaich iñugiksuat qiñiġruaqługiḷḷu uumikkunmigni.

¹³ Aglaan Atanġum iglautigigaich piḷuusiqirit, iḷisimavluni suksraunġiqsauyasitilaaŋannik.

¹⁴ Piḷuusiqirit savikpatiŋ amugaich iiggutivlugiḷḷu pisiksitiŋ tuqutchukługich iḷiappaich suiḷḷiuqtuaqtuallu, tuquġaġukługiḷḷu iluaqtuaguruat;

¹⁵ aglaan tuqutauniaqtut ilaisa savikpagmignik, pisiksiŋiḷḷu navguġutiŋ.

¹⁶ Mikiruaq unnii iñulluatam piññaktaaŋa akisułhaaqtuq umialgutipayaaŋiññiñ piḷuusiqirit,

¹⁷ Atanġumkii suaŋŋataiġñiaġaa piḷuusiqiri, aglaan qaunaginiaġaich iluaqtualiqiruat.

¹⁸ Atanġum qaunagisuugai inmiñik kamaksriruat, suli kiŋuvaannaktaaqtiŋ piginiaġaat taimuŋa isuitchuamun.

¹⁹ Nagliksaaġumiñaitchut suna iluiḷḷiġaluaqpan; inuqtuġaġniaŋitchut niqaiḷḷiuġnaqsigaluaqpan.

²⁰ Aglaan piḷuusiqirit tuquniaqtut; akiḷḷiqsruqtuat Ataniġmik tammaġniaqtut nunami nauriat tammaġmatun; tautugnaiġñiaqtut avyutun.

²¹ Piḷuusiqirit attaqsikamiŋ utiqtitchisuitchut, nakuurualliasii naglikkutiqaqłutiŋ aitchuisalgurut.

²² Tamatkua quviasuusiaqaqtuat Ataniġmiñ kiŋuvaannaktaaksriusiaqtiŋ nunannaktaaġiniaġaat, tamatkualiasii pimaqłuusiaqaqtuat God-miñ anitaulutiŋ.

²³ Atanġum aullatigaatigut igliġusiksraptiktun navianniuqtinŋitkai iviġaktuaqtini.

²⁴ Ulġugumiŋ, ulġuŋaataġniaŋitchut, Atanġumkii makitqiksinniaġai.

²⁵ Uvva utuqqaliruŋa; Iñuuruŋa sivisuruamik, aglaan tavra tautuŋaitchuŋa iñulluatanik Atanġum suksraaqtaŋiññik naakkaunnii miqłiqtuŋich niqiksraqsiuliġmata.

²⁶ Iñiqługu qaitchiŋaiyuitchut allanullu attaqsipkaisuurut, miqłiqtutiŋ quviasuusiaġigaich.

²⁷ Tunurruŋ piḷuktuaq aasii nakuurualiqilutin, kiŋuvaatin iñuusaġatallayumaut nunami;

²⁸ Atanġumkii nakuaġigaa suna iluaqtuaq suli suksraayuitkai inmiñun ukpiqsraqtuat iḷumutuuqłutiŋ. Qaunagisuugaich isuitchuamun, Aglaalli kiŋuvaaŋich piḷuktuat anitauniaqtut.

²⁹ Iluaqtualiqirauruat kiŋuvaannaktaaksriusiaqtiŋ nunannaktaaġiniaġaat suli iñuusaġataġvigilugu isuitchuamun.

³⁰ Uqaluŋich iñulluatat isumattutiqaqtut, suli nalaunŋaruagusuurut.

³¹ Pitqurriutaich God-im uummanmiutaġuugaich unitqataalaił̣ł̣ugiḷḷu.

³² Piḷuusiqirit naipiqtuisuurut iñugiksuanik taimmaasii tuqunniatagmivḷugich;

³³ aglaan Atanġum qimaiññaġniaŋitkai akiḷḷiisa suaŋŋataannun naakkaqaa suksraaqtinniaŋitkai uqaqsitaaġurraukpata.

³⁴ Niġiukkutiqaġiñ Ataniġmiñ suli kamaksriḷutin Ilaan piraksriutaiññik; Ilaan kamanaqsiḷiġniaġaatin nunannaktillutin, suli qiñiġniaġitin piḷuktuat anitaukpata.

³⁵ Iḷisimaŋaruŋa iñugmik piḷukłuni taluqsralliaġinniguuruamik; qulaŋiqsimaugaqługu kiñapayaaq napaaqtuŋatun Lebanon;

³⁶ aquvatigun piiqsuq, tavraniinŋaiqłuni; Ivaagaluaqługu, paqinŋiḷḷakkiga.

³⁷ Nalunaigisigich iñulluatat, naipiqtuġlugich iluaġniaqtuaguruat; piaqłaŋŋataitchuat iñuich kiŋuvaaqaqtut,

³⁸ piḷuusiqirit aglaan suksraunġiqsaupiaġuurut, suli kiŋuvaaksraitchut.

³⁹ Atanġum annautisuugai iluaqtualiqirit annaksimaaqtiłługich iłuiḷḷiuliġmata.

⁴⁰ Atanġum ikayuġuugai annautivlugiḷḷu; annautisuugai piḷuktuaniñ, annaksaqtuġvigisuuvlugukii Ilaa.