Psalms 36 - Iñupiatun Mumiksat Uqalugiksuat

Iñuum Piḷuusiqutaa

Atuqtit aullarriŋannun. Aglaaŋa David-gum, Atanġum kivgaŋata.

¹ Piḷuun uqaurrisuuruq piḷuktuanun itisivḷugu qamani uummataiññun; ayyaktuġaat taluġiŋił̣ł̣ugu God.

² Inmiñun suunasugivaił̣ł̣uni, qanutun piḷuktuagutilaaqtik nalugaaq.

³ Uqausiŋat piḷuktuq suli siḷivinŋarut sagluuġutinik; Isumattutaiŋarut nakuurualiqillaiqłutiglu.

⁴ Piḷuktuanik sivunniuġaqtut tuttaaqamiŋ; nakuurualiqisuitchut, ayyaktulaitchut piḷuktuanik.

Nakuuruaguniŋa God-im

⁵ Ataniiq, nuŋulaitchuam nakuaqqutikpich tikitchuugaich qiḷaich; iḷumutuuġutin tikitchaqtuq pamuŋa qiḷagnun.

⁶ Iluaqtuaguniġiñ irrusiqaqtuq qutchikpaktuatitun iġġitun; iḷumutuuġutin arriqaqtuq mitaiḷaŋisun taġium. Iñuiḷḷuasii niġrutillu qaunakkutigniittut.

⁷ Piññaġnaqtigiruq, God-iiŋ, nuŋulaitchuaq nakuaqqutin! God-im iñuŋi navianaitchuamik paqittaqtut ataagni isaqqukpich.

⁸ Niqinaqiraqtut inuaŋaitchuanik niqiksrirrutignik; imiqtitaaġmigitin kuuŋaniñ nakuuniqpich.

⁹ Kaŋiurutin iñuupayaaqtuanun, qaummatin pisigivlugu qaummaq tautullagikput.

¹⁰ Kiikaa nakuaġikkich Ilignik iḷitchuġiŋaruat nakuutilugiḷḷu iluaqtuaguruat.

¹¹ Arguaŋaruanun iñugnun maksrigvigipkaġnaŋa naakka piḷuusiqirinun qimaaratchipkaġnaŋa.

¹² Tautuguŋ piḷuktuat ulġuġaġviat. Nalarut, makillaiqhutiŋ.