Psalms 35 - Iñupiatun Mumiksat Uqalugiksuat

Aŋaiyyutaa Ikayuqtisiuqtuam

Aglaaŋa David-gum.

¹ Akiḷḷiḷiqsukkich akiḷḷiḷiqsuqtitka, Ataniiq, suli aŋuyakkich tamatkua aŋuyaktitka!

² Tigulugu akkiaġautin aŋuyaunnaġlu annuġaan qaiḷutin annautiŋŋa.

³ Iigutikkik panallu aŋuyaktim anauttaŋalu akiḷḷiḷiqsuġlugich maliqataqłiqsuat uvamnik. Unniqsuqłiiŋŋa annautiniaġniḷuŋa.

⁴ Uvamniktuq iñuaġniḷuktuat akiiḷiraulich kanŋutchaktitaulutiglu! Sivunniuqtuallu pimaqłuutiksramnun utiġlich qanuqsausiiġutiglu!

⁵ Arriḷiñaġlich amiġaiyaġnitun tiŋmiġalatchiraatun anuġim isaġulgata Atanġum tiŋititaqługich!

⁶ Apqutaallu taaġli quayaġnaqsimmiḷuni isaġulgata Atanġum maliqataġmagich!

⁷ Sumik patchisaiḷaat naniġviksriuġaanŋa nivakłutiŋ iḷuqsraqpagmun pisaġisukłuŋa.

⁸ Iliŋich suksraunġiqsauniaqtut quviqtillutiŋ; naniqtillutiŋ iliŋisa piyaqquutiksriamignun katagvigilugu suksraunġiutiksraqtiŋ!

⁹ Quviasugniaqtuŋa pisigilugu Ataniq; quviasugniaqtuŋa qanukkii annautigaaŋa.

¹⁰ Iluqaaġluŋa uqallautiniaġiga Ataniq, “Piitchuq Iliktun ittuamik. Anniqsuġuugitin piḷguitchuat suaŋaruaniñ, iḷiappauruat nagliksaaqtitchiriŋiññiñ.”

¹¹ Piḷuktuat uqausiġisuugaanŋa akiḷḷiqsruqłuŋa pasivḷuŋalu savamaqłuutinik nalukkamnik.

¹² Pigiiḷḷiqunmik akisaqłuŋa nakuurualiqiamnun, muġrugaqtuŋa ipiqtusuunmun.

¹³ Aglaalli naŋinmata, atiraqtuŋa miitchugnik Niġiŋaiḷautigivlugiḷḷu; aŋaiyyuvluŋa pułłuŋa,

¹⁴ isumaaġutigimmatun avilaitqatiga naakka aniqatiga. Iglauraqtuŋa punŋavluŋa isumaaġunmi, aakamnun qiñuuqtuatun.

¹⁵ Uvaŋaliasii iluiḷḷiuqama, iluqatiŋ quviasuguurut katittaqtut avatimnun kipagivluŋa; naluraġma anaullaqłuŋa patimigmivḷuŋa.

¹⁶ Iñuich kipakłiqsuatun pisaaŋŋatikun; qiñiġruaqłuŋa uumisuunmi.

¹⁷ Qanutuvsaaq, Ataniiq, qiñiqsiññaġniaqpich? Annauttuŋŋa piyuutaanniñ; annauttuuŋ iñuggutiga makkunaŋŋa laiyaalugniñ!

¹⁸ Tavraliasii quyanaaġniaġikpiñ katitpaktuani; Nanġaġniaġikpiñ sivuġaanni iñusalaich.

¹⁹ Sagluuqtuanun akiḷḷimnun, piukhaaġvigipkaġnaŋa akiiḷiraunipkun. Uumisuktuat uvamnik patchisaiḷakun tivsisautigipkaġnaŋa isumaaġnipkun.

²⁰ Uqalaitchut tutqigñaqtuakun; piġuqtiqługich sagluuġutigiyumiñaqtilaaġaġigaich piaqłuktautaiññiġmik nakuaqsriruat iñuich.

²¹ Pasiuġaanŋa, saqłakłutik, “Qiñiġiptigiñ sutilaaġnik!”

²² Ilvich aglaan Ataniiq, tautuŋagiñ taamna. Tainnamik nipaisimaaġnak, Ataniiq; uŋasigñak uvamniñ!

²³ Ki Ataniiq, ikayuŋŋa; makittin, God-iiŋ, iŋiqsruutiŋŋa.

²⁴ Ilvich ataŋ iluaqtuagurutin. Ataniiq, aasii nalunaiŋŋa patchisaisilaamnik; akiḷḷimnun kamanniraaġutigipkaġnaŋa.

²⁵ Inmignun uqaqtinnagich, “Kiisaimmaalu! Nalautisiññaqtuq uvagut piyummatikput!”

²⁶ Tamakkuatuq kamanniraaġutiqaqtuat uvamnik isumaaqama akiiḷiraupiallaglich qanuqsausiiġutiglu; tamatkua nakuułhaaqtualiuqtuat uvamniñ maturaulich kaviġḷuksiñmik kanŋusuunmiglu.

²⁷ Tamatkuatuq quviasuktuat patchisaisilaamnik nipaalalich quviasugutiŋ uqallatqigaaqtaġutiŋ, “Qanutun uvva kamanaqtigiva Ataniq! Iviġaummiruq piḷḷuatautaanik kivgaġiraġmi.”

²⁸ Uvaŋali iḷisimapkaġniaġiga nalaunŋaruagutilaan, suli nanġaġlutin uvluqtutilaaŋatun.