Psalms 34 - Iñupiatun Mumiksat Uqalugiksuat

Nanġaun God Nakuuniŋagun

David aglaaŋa uniññamiuŋ Abimelech kinnaġuŋŋuaqqaaqhuni aasii anitił̣ł̣uni Abimelech-mun.

¹ Quyanaaŋaiġñiaŋitkiga Ataniq; Ilaa nanġaŋaiġñiaŋitkiga.

² Nanġaġniaġiga Ilaa savaaŋisigun; nagliksaaqtitaupayaaqtuattuq tusaalutiŋ quyyatiqaġlich!

³ Nivliraqasiqsiŋa Atanġum kamanautaagun; nanġaġlakput Ilaan atqa atautchikun!

⁴ Aŋaiyyukama Ataniġmun, Ilaan kiugaaŋa; qiḷiqsimaŋaiqsiłłuŋa sivuuqqatipayaamniñ.

⁵ Iluiḷḷiuqtuam qiviaqługu quviasuliġaqtuq; tainnaġumiŋ kanŋusuutiksraitchut.

⁶ Ikayuqtaiḷḷiuqtuam ququullavigimmani kiusuuruq; annautivlugich aasii iłuiḷḷiuġutipayaaŋiññiñ.

⁷ Isaġulgata munaġisuugai qiksiksraġmata Ataniġmik suli annautivlugich navianaqtuamiñ.

⁸ Ilignigli iḷitchuġisaġuŋ qanutun Ataniq nakuutilaaŋa. Quviasuktut annaksaġviqaqtuat ilaanik.

⁹ Nanmiñiq iñugipayaaqtaŋisa qiksigilirruŋ Ataniq; Ilaanik kamaksriruat susuksiulaitchut.

¹⁰ Lion-gich unnii kaaliġuurut niqaiḷḷiuqamiŋ, kamaksriruat aglaan Ataniġmik piiḷḷiulaitchut nakuuruanik.

¹¹ Qaisitchi, miqłiqtumaaŋ, naalaġnisiñŋa, iḷisautiniaġivsiuvva qiksiksraġniġmik Ataniġmun.

¹² Iñuulluatallatuvich? Iñuuniqtusukpich quviasugutillu?

¹³ Tainnaitchukkuvich uqaqsaiḷiiñ pigiitchuanik sagluuqsaiḷiḷutillu.

¹⁴ Tunurruŋ pigiitchualiqiniq aasii nakuurualiqilutin; kipiġniuġutigilugu tutqiun piññaktaaġiniaġlugu.

¹⁵ Atanġum munaġisuugai iluaġniaqtuaguruat naalakługiḷḷu ququullatai;

¹⁶ aglaan paaqłakługich piḷuktualiqirauruat, taimmaasii tuqukamiŋ, puiguqtauvlutiŋ.

¹⁷ Iluaqtualiqiri ququulamman Ataniġmun, naalaguugaa; annautivlugu iluqaiññiñ iłuiḷḷiuġutiksraŋiññiñ.

¹⁸ Ataniq qanittuq qapiqpaŋaliqsuanun; annautivlugich niġiukkutaipiallaktuat.

¹⁹ Iñulluatat igḷutuġuurut iñugiaktuanik iluiḷḷiuġutinik, Atanġum aglaan annautigaluamiiġuugai iluqaiññiñ;

²⁰ Atanġum munaġipiallaguugaich; atausiq unnii saunġat naviŋaitchuq.

²¹ Piaġiirrutaan tuqunniaġaa piḷuusiqiri; uumiksriqsuallu iluaġniaqtuanik tatavsaqtauniaqtut.

²² Atanġum annautiniaġaich iñuni; tamatkua Ilaanun annaksaqtuat tatavsaqtauniaŋitchut.