Psalms 33 - Iñupiatun Mumiksat Uqalugiksuat

Atuutaa Nanġautim

¹ Iluġavsi iluaġniaqtuaguruasii, qasalaaġutigisiuŋ quviasuuttaġilugu Atanġum savaaŋa; nanġaqsiuŋ, kamaksripayaaqtuasii Ilaanik.

² Quyanaaqsiuŋ Ataniq atuqtuuraġusi nuqaqtilignik. Atuġlusi nuqaqtilignik atuqtuurautigillaan.

³ Atuutilugu Ilaa atuutitchauramik, nuqaqtilik nivliraqtilluataġlugu quvianaq qasalaaġutigiuŋ!

⁴ Uqaluŋi Atanġum iḷumun ittuagurut, savaapayaaŋiḷḷu ukpiġnaqtut.

⁵ Atanġum nakuaġigaa iluaġniaqtuaq iḷumutuuqtuaġlu; nuŋulaitchuam nakuaqqutaan nuna siḷivinŋagaa.

⁶ Atanġum inillaktuaŋagai qiḷaich piraksriqsuunmigun, siqiñiq, tatqiq, uvluġiallu uqallaunmigun.

⁷ Katillaammivḷugich taġiut atautchimun; tutquqługich taġium itiruaŋich tutquqsivigñun.

⁸ Qiksigisiuŋ Ataniq, nunapayaaguruasii! Qutchiksiḷiqsiuŋ, iñuuruasii nunapayaurami!

⁹ Uqallagman, nuna savaaguŋaruq; piraksriimman sunapayaaq niptaŋaruq.

¹⁰ Atanġum alavriḷḷagai sivunniutikkaluaŋich nunaqpauruat; Ilaan nutqaqtiłługich sivunniutiŋich.

¹¹ Ilaataliaglaan sivunniutai igḷutuutillarut isuitchuamun; sivuniġiraŋich uummanmiñi isuitchuamun ittut.

¹² Quviasugli nunaqpak God-iqaqtuaq Ataniġmik; quviasuglich iñuksraqtaaġikkaŋi inmiñun!

¹³ Ataniq anmun qiñiqtuq qiḷagmiñ qiñiġaich iñupayaat.

¹⁴ Atanniqsuivigmiñiñ, anmun qiñiqtuq iñuggutiqapayaaqtuanun.

¹⁵ Isummiġuugaich iḷisimagaiḷḷu supayaaġmata.

¹⁶ Umialik una akimanġaŋitchuq iñugiagniŋigun aŋuyaktiŋisa; aŋuyakti akimalaitchuq suaŋŋatiġruiññamigun.

¹⁷ Tuttuqpaich aŋuyaunnat anniqsuutauŋitchut akimmanmun; suaŋŋatiŋisa annautiniaŋitkaich.

¹⁸ Atanġum naipiqtuġai Inmiñik kamaksriruat, tamatkua nalupqisuutaitchuat isuitchuamun nakuaqqutaanun.

¹⁹ Ilaan annautisuugai tuqqunmiñ; iñuurivḷugich pannayugmata.

²⁰ Niġiugaqaqtugut Ataniġmun; Ilaa munaqsrikput suli ikayuqtikput.

²¹ Quviasuutiqaqtitkaatigut Ilaan; nalupqigiŋitkikput Ilaan salumaruaq atqa.

²² Nakuaqqutivittuq isuiḷaam nayuġlisigut, Ataniiq, niġiukkutikput iliŋnun tutinnaptigu.