Psalms 32 - Iñupiatun Mumiksat Uqalugiksuat

Quliaqtuġniq Piḷuutinik Suliqutigiŋaiqsauniġlu

Poem aglaaŋa David-gum.

¹ Quviasuglich piḷuutiŋisigun suliqutigiŋaiqsauruat, killuliqutaich piiqł̣ugich.

² Iñuk quviasugli Atanġum pasiŋitchaŋa killuliqiniḷugu pasiraksraił̣ł̣uni iḷitqusimiñi saglutaġautipayaaniñ.

³ Quliaŋiññapkich piḷuutitka, Piḷaiḷḷakama uvluqtutilaaŋatun qirrukłuŋa.

⁴ Uvlumi unnuamiḷu tatavsaġigma, Ataniiq; suaŋŋataipiallaŋaruŋa, uġġuk panaqłukkaŋatun upinġaam uunnaŋata.

⁵ Kiisaimmaa quliaqpatka piḷuutitka Ilignun; Iḷakutchiŋaiqł̣ugich killukuaġutitka. Sivunniqł̣uŋa quliaġupiallakługich Ilignun, aasii suliqutigiŋaiġiñ pasirauniġa piḷuusiqiapkun.

⁶ Tainnamik iḷumutuuġumiŋ iñuktin aŋaiyyuuqtuksraurut ikayuġnaqsigumiŋ paqinnaŋŋaqpich; uliqpaktun iluiḷḷiuġutit qaikpata, tikiññiaŋitkaich.

⁷ Ilvich iriqtuġvigigikpiñ; annautiniaġigma iluiḷḷiuġunmiñ. Nipatuluŋa atuutiginiaġiga annaurrutin, uvvakii annautigigma.

⁸ Ataniq uqallaktuq, “Uvaŋa iḷisautiniaġikpiñ apqutiksraġirapkun; Siḷġiqsuġutin munaġilutillu.

⁹ Kaŋiqsisaiññak tuttuqpaktun qimuktitullu, aŋalataksrauruatun anuŋisigun kamaksripkaqsaġlugich.”

¹⁰ Piḷuktuat nagliksaaqtuksraurut, aglaalli ukpiġutiqaqtuat Ataniġmun munaqsriqaqtut nuŋulaiḷaamik nakuaqqutaanik.

¹¹ Ilivsi iluaġniaqtuasii, qaamasuutiqaġitchi quviasuglusiḷu pisigilugu Atanġum savaaġiŋaraa. Ilivsi kamaksriruasii Ilaanik qasalaaġlusi quviasukpagitchi!