Psalms 31 - Iñupiatun Mumiksat Uqalugiksuat

Aŋaiyyun Ukpiġivlugu God

Atuqtit aullarriŋannun. Psalm aglaaŋa David-gum.

¹ Ullakkikpiñ, Ataniiq, munaġitquvluŋa; kanŋunaqsiḷiqtaupkaġniaġnaŋa. Annauttuŋŋa, nalaunŋaruaguniġni!

² Siutin tuŋimnuglugu, akkupaglu annautiluŋa! Uyaġauruatin uqqirvigilakpiñ, munaġitquluŋalu; annaksimaaġvium suaŋaruam annautiniaqtaŋani.

³ Uyaġagigapkiñ suli annaksaqtuġvigivlutin; igliġutiŋŋa sivulliuŋŋalu atqiñ pisigilugu.

⁴ Piiqsinŋa nigatchialiqsuutaanniñ uvamnun; uqqisimaaġvigigikpiñkii.

⁵ Inillakkiga iḷitqusiġa argagnun. Tasuqsaŋagigma, Ataniiq; God-auruatiin iḷumutun.

⁶ Uumigigitka nanġaisuuruat god-iŋŋuanun, uvaŋaaglaan ukpiġigiga Ataniq.

⁷ Qaamasuutiqaġniaqtuŋa quviasugluŋalu qanuq tautuŋagiñ nagliksaaġutiga suli iłuiḷḷiuġutaa; iḷitqusiġma.

⁸ Suli ilvich tigupkaŋaitkigma akiḷḷimñun; atanniqsuqtaił̣ł̣uŋa iglaullasiŋagigma sumupayaaq.

⁹ Nagligiŋŋa, Ataniiq, uvvaataŋ iluiḷḷiuġutiqaqtuŋa; irraka piḷaiḷḷaktuk isumaaqpaił̣ł̣uŋa; iḷitqusiġalu suli timiga.

¹⁰ Susallaiḷḷakkaaŋa isumaaġutim, qirratigmauvva iñuggutiga naikł̣ipkaġaa. Piḷguiḷiruŋa pisigivlugich pigiiḷḷiqiatka, marraunnii saunitka sayaiqsaiññaqtut.

¹¹ Akiḷḷiipayaatka pisigivlugich, siḷalliima suksraġisuitkaanŋa. Iḷisimarigmaunnii kanŋugivluŋa avuunnaaqtuġaanŋa; tautukkamiñŋa apqutini, qimaaqsiraqtut.

¹² Kisupayaam puiguŋagaanŋa, ilauvaŋa tuquŋaraq; arriqaqtuŋa iktatun.

¹³ Tusaaraġigitkakii iñugiaktuat uqautikłiqsuat; tatamaanaqtuam avanŋagaaŋa. Sivunniuġutigigaanŋa paaqłaunmik, tuqutchukłuŋa sivunniuqtut.

¹⁴ Ukpiqqutiga aglaan iligniittuq, Ataniiq; Uqallaŋaruŋa ilvich God-igigikpiñ.

¹⁵ Iñiqługu qaunagisuugigma; annautiŋŋa akiḷḷimniñ, tamatkunaŋŋa nagliksaaqtitchirimniñ.

¹⁶ Qiñiġuŋ kivgan iluaqtuakun; annauttuŋŋa nuŋulaitchuamik nakuaqqutignik.

¹⁷ Ququulagikpiñ, Ataniiq; kanŋunaqsiḷiqtauŋiḷḷaŋatuq. Piḷuusiqirit kanŋunaqsiḷit; nipaiḷḷutiŋ nunaŋannuglich tuquŋarat.

¹⁸ Nipaiqsitkich sagluuqtit— piukhaaqtit arguaŋaruallu uqaqhutiŋ anmuqsruivḷutiŋ iluaqtualiqirinik.

¹⁹ Qanutun kamanaqtigiva nakuuniġiñ, Ilvich tutquqsimaran tamatkunuŋa qiksigirignun! Kiapayaam iḷitchuġiŋagaa qanutun nakuutilaan, annaksimaaġviurutin ukpiqtuanun Ilignun.

²⁰ Iriġaġigitin navianaiññiŋanun nayuutiniqpich sivunniumaqłuutiŋiññiñ allat; navianaitchuamun uqqisimaaġvignun iriqługich pisaaŋŋataiññiñ.

²¹ Nanġaqsiuŋ Ataniq! Qanutullu aliuġnaqsitigivlugu maniuġmauŋ nakuaqqunni uvamnun avanmanŋalu aŋuyagmanŋalu!

²² Iqsitchakama isumaruŋa ayyakkasugaluŋa takkuġniñ. Aglaan tusaagiñ qirratiga, Ilignun ikayuqtisiuqama.

²³ Nakuaġisiuŋ Ataniq, ilivsi iñuich iḷumutuuqtuasii. Atanġum munaġisuugai iḷumutuuqtuaguruat, aglaan tatavsaqługich arguaŋaruat tatavsaaksrauruat.

²⁴ Suaŋŋatiqaġitchi, sivuuqqataiḷḷusiḷu, iluqavsi niġiukkutiqaqtuasi Ataniġmun.