Psalms 29 - Iñupiatun Mumiksat Uqalugiksuat

Iġñaŋa Atanġum Anuġikun

Psalm aglaaŋa David-gum.

¹ Nanġaqsiuŋ Ataniq, ilivsi qiḷaŋmiittuasii; nanġaġlugu qaummataa suaŋŋataalu.

² Nanġaqsiuŋ Atanġum kamanaqtuaq atiŋa; Nanġaġlugu Ataniq piññaġnaġniŋagun salumaniŋata.

³ Iġñaŋa Atanġum tusaġnaqtuq taġiuni; kamanaqtuaq God nipanman kalluktun, iġñaŋa qulaagun taġium qaiġuatitaqtuq.

⁴ Iġñaŋa Atanġum tusaġnaqtuq suaŋŋatipayaamiñi qutchiksuaguniġmiñiḷu.

⁵ Iġñaŋa Atanġum navgiruq cedar-nik napaaqtunik, tamatkua unnii cedar-t napaaqtut Lebanon-miittuat.

⁶ Ilaan minŋiqtitkaich iġġiŋich Lebanon qimuktiayaatun suli Mount Hermon nutikałuaqtitaqługu aŋusalluuratun.

⁷ Iġñaŋata Atanġum igniġuuqpatitaqtitkaa.

⁸ Iġñaŋata nunagluktuaq aulapkaġaa; Aulalatchigaa nunagluktuaŋa Kadesh-gum.

⁹ Atanġum iġñaŋata oak napaaqtut aulatitkaich; akutuqpaliŋich katagaaqtiłługich napaaqtut Aŋaiyyuvikpaŋani iluqaġmiŋ ququularut, “Nanġaqtauli God!”

¹⁰ Atanġum atanniqsuġai itiruat immat; atanniqsuiruq umialguvluni isuitchuamun.

¹¹ Ataniq suaŋŋatiksritchisuuruq iñugmiñun quviasuusiqł̣ugiḷḷu tutqiunmik.