Psalms 28 - Iñupiatun Mumiksat Uqalugiksuat

Aŋaiyyun Ikayuqtisiuqhuni

Aglaaŋa David-gum.

¹ Ataniiq, sapunniaqtiga, ququularuŋa ilignun. Tusaagguuŋ qirratiga! Uvvakii kiuŋitkumŋa, Iḷaginiaġaanŋa samuŋaqtuat nunaŋanun tuquŋarat.

² Tusaaŋŋa ikayuqtisiulaguma, isaaġupkik argatka tuŋaanun salumaruam Aŋaiyyuvikpakpich.

³ Suksraunġiqataupkaġnaŋa piḷuusiqirinun, tapurrauluŋa pigiitchuanun— tapurrauluŋa uqaqtuanun avilaitqatitun, uumisukkaluaŋŋaan qamma uummatiktiŋ.

⁴ Tatavsakkich savaaŋisigun, piaġiirrutaisigun. Tatavsakkich savaaġiraŋisigun paaqłiusiaksraŋat iliŋiññun qaiḷḷugu!

⁵ Puttuqsripayaayuitkaat unniikii Atanġum savaaŋa suniglu savaŋatilaaŋa; tainnamik tatavsaġniaġai aasii suksraunġiġḷugich taimuŋa isuksraiḷaamun.

⁶ Nanġaqsiuŋ Ataniq; tusaaŋagaakii ikayuqtisiuġutiġa.

⁷ Ataniq suaŋŋatigigiga suli sapunniaqłuŋalu; Ukpiġigiga ilaa. Ikayuġuugaaŋakii suli qaamasuusiqł̣uŋa; Nanġaġiga ikiaqtalaaġnaqsivḷugu atuutinik.

⁸ Atanġum kuttaqsaiḷisuugaich iñuni; sapunniaqługich annautivlugu umialiksraqtaani.

⁹ Annauttukkich iñutin, Ataniiq, piḷḷuatausiusiaqaqtillugich Ilvich pigikkatiin. Imnaiḷiqiraugguiñ ilaiññun, qaunagilugich taimuŋa.