Psalms 27 - Iñupiatun Mumiksat Uqalugiksuat

Aŋaiyyun Nanġautikun

Aglaaŋa David-gum.

¹ Ataniq qaummatiga annaurrigalu; Iqsiginiaŋitkiga kiñapayaaq. Atanġum kuttaqsaiḷigaaŋa navianniuġnaqtuapayaaniñ; Iqsisiqaġumiñaitchuŋa.

² Pigiiḷḷiqirit maksrikłutiŋ tuqunnialammanŋa, putukkił̣ł̣utiŋ ulġuraqtut.

³ Aŋuyakkumapayaaqtuat avatkaluaqpanŋa, iqsisiksraitchuŋa; akiḷḷimalu maksrigvigigaluaqpanŋa, Nalupqigiyumiñaitkiga God.

⁴ Apiqsriaġianiŋagiga atausiq Ataniġmiñ; atausitualuk pisuktaġa: iñuusukłuŋa Atanġum igluani iñuuniqtutilaamni, Aliuġiugaġluguasii Ilaan nakuuruaguniŋa, ivaġlugulu ilaan pisuutaa.

⁵ Iluiḷḷiuġnimni munaġiniaġaaŋa; anayanniuqtinniaŋitkaaŋa Aŋaiyyuvikpagmiñi inillagluŋa payaŋaitchuamun qutchiksuamun uyaġagmun.

⁶ Akimaniaqtuŋa akiḷḷimniñ avatimniittuaniñ. Qasalaaġluŋaasii quviasuunmi aitchuiḷuŋa Ilaan Aŋaiyyuvikpaŋani; Atuġniaqtuŋa, Nanġaġniaġiga Ataniq.

⁷ Tusaaŋŋa, Ataniiq, ququulagupkiñ! Naglikkutiqaġiñ suli kiuluŋa!

⁸ Uqallakkavich, “Qaiḷutin ivaġiaŋŋa,” kiugikpiñ, “Ivaġniaġiga kiiñan, Ataniiq.”

⁹ Iriġnak uvamniñ! Qinnautinaŋa; ayyagniaġnagu kivgaġikkaan. Ilvich ataŋ ikayuqtigigikpiñ; uniññaŋa, suksraaġluŋalu, God-iiŋ, annaurriiŋ.

¹⁰ Aapaalu aakagmalu iginniaġaluaġaanŋa, aglaan Atanġum qaunaginiaġaaŋa.

¹¹ Iḷisautiŋŋa, Ataniiq sutqugumŋa, igliġutiluŋaasii navianniuġnaitchuakun apqutikun, iñugiaktutkii akiḷḷitka.

¹² Qaiññaŋa akiḷḷimñun, maksrigvigirimnun sagluuġutiniglu sivuuġasaaġutiniglu.

¹³ Nalupqisuŋitchuŋa iñuunimni tautugniaqtilaaġa Atanġum nakuuniŋanik iñuullaġma suli.

¹⁴ Utaqqiḷugu Ataniq. Suaŋŋatiqaġiñ suli nikasuutaiḷḷutin Utaqqiḷugu Ataniq.