Psalms 25 - Iñupiatun Mumiksat Uqalugiksuat

Aŋaiyyun Aullatitquvluni Munaġiluniḷu

Psalm aglaaŋa David-gum.

¹ Ilignun, Ataniiq, aŋaiyyutiqaqtuŋa;

² Iligni, uvaŋa God-iiŋ, nalupqisuŋitchuŋa. Kanŋunaqtuamuktinnaŋa; akiḷḷimnun anmuqsruqtinnaŋa!

³ Akiirrutiqayuitchut tamatkua nalupqisuutaitchuat ilignun, tamatkua aglaan paaqłaksallagruaġuuruat ilignun.

⁴ Iḷisautuŋŋa piḷġusiġñik, Ataniiq; iḷisitkich uvamnun.

⁵ Igliġutiŋŋa iḷumun ittuaġirakkun suli iḷisautiluŋa, qanuq ilvich God-aurutin, annaurriga. Uvluq naałługu niġiukkutiga iligniittuq.

⁶ Puiguumanagich, Ataniiq, piaqłuktautairrutin nuŋulaitchuaġlu nakuaqqutin qiñiqtittan taimma qaŋapak.

⁷ Suliqutigiŋaikkich piḷuusiqiatka killukuaqtautitkalu nutaġaukama. Nuŋulaitchuami nakuaqqutigni nakuutigniḷu, Puiguġnaŋa Ataniiq!

⁸ Ataniq nakuuruq iluaqtuakuaqtuġlu; iḷisautigaich piḷuktuat iluaqtuamik apqunmik.

⁹ Igliġutisuugai qiñuitchuat iluaġniqsrakun iḷisautivlugit pisuunmiñik.

¹⁰ Ukpiġnaqłuni nakuaqqunmigullu sivulliuġaich iluqaisa sivunniuġunmiñik qaunaksriruat suli kamaksrivḷutiŋ pitqutaiññik.

¹¹ Nalautitkich unniqsuqłiutitin, Ataniiq, suliqutigiŋaiġḷugiḷḷu piḷuutitka, atakkii iñugiaktut.

¹² Ilaich qiksiksraqtuat Ataniġmun ilaaniñ iḷitchiñiaqtut sukkuaqtuksrautilaamignik.

¹³ Ataramik piḷḷuatautiqaġniaqtut, suli miqłiqtuŋich nunannaktaaqaġlutiŋ.

¹⁴ Ataniq avilaitqatauruq inmiñik kamaksriruanun tunulliḷiqsuqługulu sivunniuġutini iliŋiññun.

¹⁵ Qiñaasuugiga Ataniq ikayuqtisiupayaaqama, annautisuugaaŋa anayanaqtuaniñ.

¹⁶ Qiviaŋŋa, Ataniiq, naglikkutiqaġiñ uvamnun, alianniuqtuŋakiuvva suaŋaitchuŋalu.

¹⁷ Iłuiḷḷiuġutitka uummatimni aglisaiññaqtut annautiŋŋa iłuiḷḷiuġutipayaamniñ.

¹⁸ Isumalaaġutigiuŋ iluiḷḷiuġutiga nagliksaaġutigalu suliqutigiŋaiġḷugiḷḷu piḷuutipayaatka.

¹⁹ Tautukkich iñugiaktuat akiḷḷiitka; qanutullu uumigiqpaktilaamnik.

²⁰ Munaġiŋŋa annautiluŋalu; kanŋutchaipkaġnaŋa, qanuq Annaksaġvigigikpiñ.

²¹ Nakuuniġmatuq iḷumuuġniġmalu munaġiliŋa, atakkii ukpiġigikpiñ.

²² Iłuiḷḷiuġutipayaaŋiññiñ, God-auruatiin, Israel-guruat iñuktin annauttukkich!