Psalms 24 - Iñupiatun Mumiksat Uqalugiksuat

Kamanaqtuaq Umialik

Psalm aglaaŋa David-gum.

¹ Nuna tamatkiqł̣ugiḷḷu nunamiittuat Atanġum iluqaisa pigigaich; nuna iluqaisalu iñuuruat nunami Ilaata pigigaich.

² Nappaŋagaa qutaiḷani immani nunam ataaniittuam maŋŋuliqł̣ugich taġium itiniŋisigun.

³ Kiñakiaq imña mayullayumiñaqpa Atanġum qimiġaŋanun? Kiña suli isillayumiñaqpa salumaruamun Aŋaiyyuvikpaŋanun?

⁴ Ami tamatkua salumaruat surġausimigni isumamigniḷu, nanġaisuitchuat iñuuraqpagnun suli saglukun unniqsuqłiiḷaitchuat.

⁵ Atanġum tainnaittuat piḷḷuatausiġñiaġai annautilugiḷḷu; God-im killukuaŋaitchualiñiaġaich.

⁶ Tainnaittuat iñuich God-muguurut, sivuġaanukhutiŋ God-iŋanun Jacob.

⁷ Aŋmalgutilaaqsigi upkuaqpaich, agmaġlugich aippaaniqsat upkuat, kamanaqtuaq umialik isiġumauq.

⁸ Kiñauvvauna kamanaqtuaq umialik? Ilaaguruq Ataniq, saŋŋiruaq suaŋŋatiqaqtuaġlu, Ataniq, akiiḷiñaitchuaq aŋuyaktuani.

⁹ Agmaviñaqsigi upkuat, aippaaniqsat upkuat, aasii kamanaqtuaq umialik isiġniaqtuq.

¹⁰ Kiñauvvauna kamanaqtuaq umialik? Akimapqauraŋitchuaq Ataniq—ilaaguruq kamanaqtuaq umialik!