Psalms 22 - Iñupiatun Mumiksat Uqalugiksuat

Qirran Nagliksaaġniġmi Atuullu Nanġaunmi

Atuqtit aullarriŋannun. Atuunmun “Aġnasalluq Tuttu Uvlaaguruami.” Psalm aglaaŋa David-gum.

¹ God-iiŋ, God-iiŋ, summan suksraaqpiŋa? Qirrukkaluaqtuŋa ikayuqtisiulapiaqłuŋa, ikayuqti qaiḷaitchuq.

² Uvlumi ququulagikpiñ, God-iiŋ, aglaan kiusuitchutin; unnuami ququulakama, unaŋuiyuitchuŋa.

³ Aglaan aquppiutaqpagmiittutin Salumaruaguvlutin, Ilvich Israel-gum nanġaqtaŋa.

⁴ Maŋŋuupta ukpiġiliutipiallaŋagaatin; ukpiġimmatin, annautiraġigitin.

⁵ Ququulammatin annaguurut navianaqtuamiñ; ukpiġiŋagaatin aasii kanŋunaqtuamiinŋaitchut.

⁶ Uvvaaglaan iñugruiññauŋaiqsuŋaunnii; Qupilġuuruŋa, samuŋaqsruġaanŋa kipagivluŋalu kisupayaam!

⁷ Iñupayaat tautukkamiñŋa kipagigaanŋa. Qiññaġlukłuŋa niaqulaaqłutiŋ uqallaktut,

⁸ “Ukpiqsraqtuq Ataniġmun, Atanġum annautiliuŋ; Atanġum piqpagipiaġumiuŋ, ikayuġliuŋ.”

⁹ Ilvich anipkaŋagiŋma aakamniñ. Ukpiġiliqsinŋarutin uvamnun miluŋŋaġmasuli aakamniñ.

¹⁰ Qaunaginagutimagigma aniḷuqqaaqama, God-igisaŋagikpiñ anivḷuŋalu.

¹¹ Qimaummiñiaġnaŋa! Isumaaluun qanittuq, ikayuqtiksraiñmiuŋa.

¹² Akiḷḷiima avatkaanŋa aŋusallusalaktun; Qinnakpaktuat aŋusalluŋisa Basham-gum avatpakkaanŋa.

¹³ Aatchaqługich qanitiŋ laiyaaluktun, ugiallavlutiŋ siqumitchukłuŋa.

¹⁴ Suaŋŋataiqsuŋa, kuviruatun imiq nunamun. Navyaapayaatka uniuqtittut; uummatiga aukkaa patiquraliaksratun.

¹⁵ Iggiaġa paliutigaa avyutun, uqaġa nipittaqtuq qiḷagamnun. Uniñŋagiŋma tuqutchirriutivluŋa avyumun.

¹⁶ Pigiiḷḷiqirit katiłłutiŋ avatkaanŋa; qimmitun atautchikuaqhutiŋ qalliuraġvigigaanŋa; kapiŋagaich argatka isigatkalu.

¹⁷ Saunipayaatka tautugnaqtut. Akiḷḷiima takunnaġaanŋa arguaŋaaġvigivluŋalu.

¹⁸ Autaaġaich annuġaatka inmignun aasii saaptautigivlugich.

¹⁹ Ataniiq, unimmiñaŋa! Suaŋŋatigigikpiñ; qaġġiiñ qilamik annautiluŋaasii!

²⁰ Annauttuŋŋa savikpagmiñ; annautiluŋalu ukunaŋŋa qimmiñiñ.

²¹ Annauttuŋŋa laiyaqpagniñ; akiḷḷiliqsuutiksraitkitkaukua aŋusalluŋich niġrułłuich.

²² Kiligniaġitka iñutka qanuq savaŋatilaaġnik; Nanġaġniaġikpiñ katitpata:

²³ “Nanġaqsiuŋ, kivgauruasii Ataniġmun! Qutchiksiḷiġlugu, kiŋuvaaguruasii Jacob-miñ! Qiksigisiuŋ, Israel-guruasii!

²⁴ Ilaankii suuŋiḷaġilaitkai iḷiappaaluich isumaaluyuiñŋitchuġlu nagliksaaġmata; ilaata tunulaitkaich, kiuvlugich aglaan ikayuqummata.”

²⁵ Naamavlutiŋ katittuani nanġaġniaġikpiñ ilvich savaaġiŋarapkun; takkuqsraaġlugich ilignik nanġairuat qaitchiḷuŋa aitchuutiginiaġniŋaramnik.

²⁶ Piiḷḷiuqtuat qanutulimaaq niġisuiqsuaġniaqtut; tamatkua qairuat Ataniġmun nanġaġniaġaat. Piḷḷuataqtuasuŋaiññaġlitchuq!

²⁷ Nunaqpauruat itqaġniaġaat Ataniq. Nunam sulliñipayaaŋiññiñ qiviaġviginiaġaat; iñuich allakaaġiich aŋaiyyuviginiaġaat.

²⁸ Qanukkii Ataniq umialguruq, atanniqsuġaiḷu nunapayaat.

²⁹ Piukhaaqtipayaam purviginiaġaa; iñugruiññapayauram sitquġviginiaġaa.

³⁰ Kiŋuvaaqatigiikkumaaqtuapayaat savautiniaġaat; uqausiġiniaġaat Ataniq tikiutiniaqtuanuttauq kiŋuvaaġiiñun.

³¹ Iñuich aniŋaitchuat unnii uqaurrauniaqtut: “Atanġum annautigaich Ilaan iñuni.”