Psalms 17 - Iñupiatun Mumiksat Uqalugiksuat

Aŋaiyyutaa Patchisaitchuam Iñuum

Aŋaiyyutaa David-gum.

¹ Naalaguŋ, Ataniiq, qiññutiga patchisaitchukłuŋa; nalunaiqsruġuŋ qirratiga ikayuquvluŋa. Tusaagguuŋ iḷumutuupiallakłuŋa aŋaiyyutigikkaġaa.

² Isivġiiñiaqtutin iviġagluŋa, iḷisimasuugiñkiataŋ suna iluaqtuagutilaaŋanik.

³ Iḷisimagiñ uummatiga. Ullaguugigma unnuakun; qanuqitilaaqtuaqłuŋa isivġiqsuaqłuŋa tamaġma paqitaksraitchutin aasii uvamni piḷuktuam kipiqqutaanik. Sivunniŋaruŋa uqaġuŋił̣ł̣uŋa piḷuktuanik,

⁴ allatitun iñuktitun; Kamagisuugitka piraksriutitin maliġisuitkitka tumiŋich maqutchirit.

⁵ Pisuaġuuruŋa apqusiuqtakkun maliġisuugitka asivaġaluaġnagich.

⁶ Aŋaiyyuvigigikpiñ, God kiusuugigmakii; aasii saalluŋa naalakkich uqalutka.

⁷ Manniuŋ aliuġnaqtuaq nakuaqqutin aasii annautiluŋa; saniġaġniinnama navianniulaitchuŋa akiḷḷiimniñ.

⁸ Munaġiŋŋa ilvich irrakkiñ munaġimmatun; iriŋŋa taġġisimaaġluŋa isaqqukpich ataagni

⁹ piyuaġutaanniḷḷu piḷuusiqirit. Avanŋagaanŋa iñuaqtuqtit akiḷḷiima;

¹⁰ nagliksraġniġmik nalurut uqaqpaguummiut kamanniraaqłutiŋ.

¹¹ Avanŋagaanŋauvva, tamarra sumun qiviaġaluaqama, naipiqtuġaanŋa sukkun puukaqtirrutiksraqsiuqłuŋa.

¹² Arriqaqtut laiyaaluktun kaaktuatun, siqumitchumaaqłuŋa, iriqsimaruatun nikpaqłutiŋ.

¹³ Qaiñ, Ataniiq! Akiḷḷiḷiqsukkich akiḷḷiitka aasii akiisillugich! Annauttuŋŋa piḷuktuaniñ suaŋŋatignik;

¹⁴ annauttuŋŋa iñugniñ iñuuruaniñ maani susuksiuŋitchuaniñ. Tatavsakkich nagliksautinik tatavsautiksriaġnik iliŋiññun; sippakutaaqtuamik unnii miqłiqtuŋiññun iḷakulugich miqłiqtuisa miqłiqtuiññun!

¹⁵ Uvaŋaaglaan tautupiallagniaġikpiñ qanukkii killukuaŋaitchuŋa; aasii iqiiġuma, nayuutiniqpich siḷivinniaġaaŋa quviasuunmik.