Psalms 148 - Iñupiatun Mumiksat Uqalugiksuat

Piraksriun Nanġaquvlugu God Sumiipayaaqtuanun

¹ Nanġaqsiuŋ Ataniq! Nanġaqsiuŋ Ataniq qiḷaŋmiñ, iñuuruasii qutchiksuani pamani.

² Nanġaqsiuŋ, iluqasi isaġuliuruasii, nanġaqsiuŋ iluqasi qiḷaŋmi iñugiaktuasii.

³ Nanġaqsiuŋ, siqiñiiq suli tatqiiq; nanġaqsiuŋ, qaummaġiksuasii uvluġiat.

⁴ Nanġaqsiuŋ, qutchigñiqsrami qiḷaŋmi, suli immat qulaaniittuat qiḷaum.

⁵ Iluqaġmiŋ nanġaġlirruŋ atqa Atanġum, piraksriiŋaruq, aasii tavra savaaguŋarut;

⁶ Ilaata inillaktaġiŋaniġaich taimuŋa isuitchuamiñ isuitchuamun, pitquraliuŋaruq piiġumiñaitchuamik.

⁷ Nanġaqsiuŋ Ataniq nunamiñ, taġium niġrułłuŋich suli iluqavsi taġium itiruaŋich;

⁸ igniġuuqpatitaqtuat natatquġnallu, apun suli nuviyat, anuġiqpaiḷḷu kamaksriruat ilaata piraksriutaanik.

⁹ Nanġaqsiuŋ ilaa, iġġiḷḷu qimiqqallu, siiġñat napaaqtuŋiḷḷu iluqaġmiglu napaaqtut cedar;

¹⁰ niġrułłuiḷḷu pamiqsaallu, paamġuġuuruallu tiŋmiallu.

¹¹ Nanġaqsiuŋ ilaa, umialguruasii iñupayaurallu, qaukłiuruallu iluqaġmiglu atanaurauruat nunami;

¹² niviaqsiallu nukatpiallu, utuqqanaallu miqłiqtullu.

¹³ Nanġautiqaġlich atqanun Atanġum! ilaan kisimi atiŋa kamanałhaaqtuaguruq allaniñ; ilaan qaumanġa qulaaniittuq nunavlu qiḷauvlu.

¹⁴ Nunaqpani ilaan suaŋasipkaŋagaa, tavraasii iluqaġmiŋ iñuŋisa nanġaġuugaat— Israel-miut, ilaanun qanittuat. Nanġaqtauli Ataniq!